د ننګرهار پوهنتون د کرنې او ساینس پوهنځیو نوي تدریسي مدیران د یادو پوهنځیو منسوبینو ته ور وپېژندل شول.
ریحان الله تسل د کرنې او سمیع الحق ایثار د ساینس پوهنځيو د نويو تدریسي عمومي مدیرانو په توګه د دلوې په ۲۸مه نېټه د بېلابېلو غونډو په ترڅ کې د ننګرهار پوهنتون د محصلانو چارو مرستیال پوهنوال سید اکرم هاشمي او د بشري سرچینو آمر حسین احمد سمندر له خوا رسماً د یادو پوهنځیو منسوبينو ته ور وپېژندل شول.
په همدې اړه جوړو شویو مراسمو ته د ننګرهار پوهنتون د محصلانو چارو مرستیال پوهنوال سید اکرم هاشمي د مخکېنیو تدریسي مدیرانو د ترسره کړيو خدمتونو یادونه وکړه او د ستاینې تر څنګ یې نوموړو ته د الله تعالی له درباره د اجر غوښتنه وکړه.
پوهنوال هاشمي د کرنې پوهنځي نوی تدریسي مدیر وړ او په کار پوه ځوان کادر یاد کړ، چې په وینا یې، له دې وړاندې هم د کرنې پوهنځي سره د تدریس په برخه کې همکار ؤ، چې د نوي تقرر سره به يې د پوهنځي تدریسي مدیریت چارې هم منظمې شي.
نوموړي دغه راز د ساینس پوهنځي تدریسي مدیر ښاغلي ایثار ته د ټاکل کېدو مبارکي وویله او د لوړو زده کړو وزارت د اصولو او مقرراتو سره سم یې ورته د سپارل شوې دندې د ترسراوي سپارښتنه وکړه.
د کرنې پوهنځي رئیس پوهندوی دکتور رشاد احمد شېرزاد او د ساینس پوهنځي رئیس پوهنیار رفیع الله رفیع د خپلو ویناوو په ترڅ کې د لوړو زده کړو وزارت او د ننګرهار پوهنتون د مشرتابه مننه وکړه، چې پر وخت یې د تدریسي مدیرانو په ټاکل کېدو کې اقدام وکړ او نویو ټاکل شویو مدیرانو ته یې د اړوندو چارو د ترسراوي په برخه کې د همکارۍ ډاډ ورکړ.
