د ننګرهار پوهنتون د لارو، ویالو، ګلدانونو او چمنونو د پاکۍ او تنظیفاتو چارې په چټکۍ سره پر مخ روانې دي.
یادې چارې ددې پوهنتون د چاپېریال ساتنې کمېټې د مستقیمې څارنې لاندې د جلال آباد ښاروالۍ او د دې پوهنتون د ساتنې او څارنې مدیریت کارکوونکو په مرسته دوام لري.
له نوموړي بهیر سره د UN-Habitat د کار په مقابل کې مزد پروژې ۶۰ تنه نور کاریګر هم یو ځای شول، چې د لسو ورځو لپاره به د پوهنتون په پاکۍ کې برخه واخلي.
د ننګرهار پوهنتون د چاپېریال ساتنې کمېټې مشر پوهنوال سید اکرم هاشمي د جلال اباد ښاروالۍ او UN-Habitat ادارې د مشرتابه او مسؤلینو مننه وکړه، چې د پوهنتون رغونې، پاکۍ او سرسبزۍ ته پاملرنه کوي. نوموړي له کاریګرو غوښتنه وکړه، چې ورسپارل شوی کار په پوره اخلاص سرته ورسوي او د پوهنتون په ښکلا او پاکۍ کې فعاله ونډه واخلي.
