د ننګرهار پوهنتون تقرر او انفکاک مجلس ددې پوهنتون د رئيس په مشرۍ ترسره شو.
په یاده کاري ناسته کې، چې د پوهنتون په ریاست مقام کې ترسره شوه، د پوهنتون د علمي چارو، محصلانو چارو، اداري او مالي چارو، د اړوندو پوهنځیو او تدریسي روغتون رئیسانو برخه لرله.
د ننګرهار پوهنتون رئیس شیخ انعام الله مدني د خپلې وینا پر مهال د مجلس غړو ته د استادانو تقرر او انفکاک پروسه کې د شفافیت او عدالت په پام کې نیولو سپارښتنه وکړه.
نوموړي زیاته کړه، چې پوهنتون کې به د وړ او ژمنو علمي کادرونو د ګمارنې او پرمختللو اکاډمیکو خدمتونو وړاندې کولو په برخه کې خپلې هڅې جاري وساتي.
د ننګرهار پوهنتون د علمي چارو مرستیال پوهندوی مولوي احسان الله ناصح، د محصلانو چارو مرستیال پوهنیار حافظ سید محمد قاسم هاشمي او د اداري او مالي چارو مرستیال مفتي نعمت الله اعزازي د مجلس د ګډونوالو سره په ګډه د اجنډا مطابق مسایلو په هکله بحثونه وکړل او د غونډې د برخه والو د نظریاتو او وړاندیزونو په پام کې نیولو سره د پوهنتون اکاډمیکو، تدریسي او نورو چارو ښه والي په موخه لازمې پرېکړې وشوې.
د مجلس په وروستۍ برخه کې د ننګرهار، کونړ سید جمال الدین افغاني، لغمان، کندز او بامیان پوهنتونونو سربېره د التقوی، روښان او مستقبل خصوصي لوړو زده کړو مؤسسو د استادانو د تقرر ۳۵ او انفکاک۴ کیسونه مطرح او په اړه یې لازمې پرېکړې وشوې.
