د ننګرهار پوهنتون اقتصاد پوهنځي ودانۍ له جوړېدو وروسته ګټې اخیستنې ته وسپارل شوه.
یاده وداني د ښار جوړولو او ځمکو وزارت د څه دپاسه ۸۹ میلیونه افغانیو په مالي لګښت په ۱۸۵۰ متر مربع ساحه کې په درې پوړونو کې جوړه شوې، چې ۶۰ اداري او تدریسي خونې، دوه د غونډو هالونه او نور ملحقات لري.
یاده وداني د غبرګولي په ۶ مه نېټه د جمهور رئیس، لوړو زده کړو وزیر او د کابیني د یو شمېر نورو غړو د پر لیکه حضور پر مهال د ولسمشر د ستر سلاکار او د ننګرهار والي ضیاءالحق امرخېل، د ولایت د اداري او مالي چارو مرستیال پوهنوال ببرک میاخېل، د ننګرهار پوهنتون رئيس پوهاند دوکتور خلیل احمد بهسودوال او د ولایتي ادارې او پوهنتون د ځینو نورو مسؤلینو، استادانو او محصلینو له لوري د یوې سترې غونډې په ترڅ کې ګټې اخیستنې ته وسپارل شوه.
غونډې ته د پرانیستې وینا پر مهال د ننګرهار پوهنتون رئیس پوهاند دوکتور خلیل احمد بهسودوال د ودانۍ په جوړېدو او پرانیسته د خوښۍ څرګندونه وکړه او زیاته یې کړه، چې یاده وداني به د اقتصاد پوهنځي د تدریسي بهیر او علمي پروګرامونو د پراختیا په برخه کې ډېره اغېزمنه تمامه شي.
پوهاند بهسودوال د ټولو هغه مسؤلینو مننه وکړه، چې د دې پروژې په منظورېدو او تطبیق کې یې د پوهنتون له ادارې سره مرسته کړې او د اقتصاد پوهنځي د رئیس پوهنوال محمد زبیر نورمل یې ځانګړې مننه وکړه، چې په هلو ځلو یې د ودانۍ چارې د بشپړتیا تر بریده ورسېدې.
د پوهنتون رئیس د اقتصاد پوهنځي مسؤلینو او محصلینو ته سپارښتنه وکړه، چې د ودانۍ په ساتنه او همدارنګه د اغېزمنې ګټې اخیستنې په برخه کې اړین اقدامات ترسره کړي.
د ولسمشر ستر سلاکار او د ننګرهار والي ضیاءالحق امرخېل د یادې ودانۍ د جوړیدو له امله زده کړیالانو او پوهنتون ادارې ته مبارکي ورکړه او زیاته یې کړه، چې هیله من دی، چې د پوهنتون پاتې پوهنځي هم معیاري ودانۍ ولري او په دې برخه کې د پوهنتون شته ستونزې هوارې شي.
نوموړي د ولسمشر څخه مننه وکړه، چې ننګرهار ته یې د ابادۍ او نورو برخو کې ځآنګړې پاملرنه شته، همدا راز یې له استادانو او محصلینو غوښتنه وکړه، چې د سولې لپاره کار وکړي او پرېنږدي، چې تپل شوې بدمرغه جګړه د ګران هېواد د ابادۍ او سوکالۍ چارې له ځنډ او خنډ سره مخ کړي.
د غونډې په وروستۍ برخه کې د ننګرهار د ځمکو او ښار جوړونې رئيس انجنیر محمد صادق دولتزي خبرې وکړې او د نوموړې ودانۍ په اړه یې معلومات د غونډې له برخوالو سره شریک کړل.
