د لوړو زده کړو وزارت لوړ رتبه پلاوي د ننګرهار د دولتي او خصوصي پوهنتونونو د فوق لیسانس برنامو ارزونه وکړه.
د لوړو زده کړو وزارت د علمي برنامو د انکشاف رئیس انجنیر سردار ولي صالحي په مشرۍ شپږ کسیز پلاوي د ننګرهار پوهنتون د علمي چارو مرستیال پوهندوی احسان الله ناصح په ملتیا ددې پوهنتون د ماسترۍ او دکتورا د ۷ برنامو علمي او تدریسي چارې له نږدې ولیدې او د یادو پروګرامونو د څارنې او ارزونې تر څنګ یې د هغو د لا زیات معیاري کېدو او غنامندۍ په اړه مسؤلینو ته لازمې لارښوونې وکړې.
د لیدنې پر مهال د راغلي پلاوي غړو د ننګرهار پوهنتون د فقهې او قانون، تفسير او حديث، قضا او څارنوالۍ، پښتو ژبې او ادب، ادارې او تجارت او عربي ژبې او ادب څانګو د ماسترۍ او د فقهې او قانون څانګې د دکتورا پروګرامونو د نصاب او کریکولم، تدریسي بهیر، درسي صنفونو، کتابتونونو، تحقیق او تیزس لیکنې مراحلو او نورو بېلابېلو برخو ارزونه وکړه.
د پلاوي غړو د ارزونې په پای کې د ننګرهار پوهنتون د رهبري پلاوي او د یادو پروګرامونو د مسؤلینو او د څانګو آمرینو سره غونډه وکړه، د هغوی غوښتنې او وړاندیزونه یې واورېدل او د برنامو د لا ښه والي او غنامندۍ په اړه یې ورته لازمې سپارښتنې وکړې.
د لوړو زده کړو وزارت د علمي برنامو د انکشاف رئیس انجنیر سردار ولي صالحي او د نظارت او ارزیابۍ رئیس انجنیر سید اسماعیل روحاني په ننګرهار پوهنتون کې د فوق لیسانس د ۷ برنامو د شتون او فعالیت په اړه خوښي وښوده او د پوهنتون د مشرتابه او استادانو یې مننه وکړه، چې په کور دننه یې استادانو او ځوانانو ته د لوړو زده کړو زمینه برابره کړې ده.
نوموړو د یادو علمي برنامو شتون په هېوادنۍ کچه ستر فرصت وباله او زیاته یې کړه، چې د لا زیات معیاري کېدو، پراختیا او پیاوړتیا لپاره به یې هلې ځلې وکړي.
د ننګرهار پوهنتون د اداري او مالي چارو مرستیال پوهنیار قاضي خالد صداقت، د علمي چارو مرستیال پوهندوی احسان الله ناصح او د محصلانو چارو مرستیال حافظ سید محمد قاسم هاشمي د یادو پروګرامونو د بهبود او معیاري کېدو په اړه د پلاوي غړو ته د اړینو اقداماتو او اجرااتو د ترسراوي ډاډ ورکړ.
د ننګرهار پوهنتون د فوق لیسانس برنامو د ارزونې وروسته راغلي پلاوي د خراسان خصوصي پوهنتون د ماسترۍ پروګرام او همدارنګه د الفلاح خصوصي پوهنتون د ماسترۍ د دوه وړاندیز شویو پروګرامونو د امکاناتو ارزونه وکړه.
د یادونې وړ ده، چې ننګرهار پوهنتون کې د ماسترۍ پروګرام د لومړي ځل لپاره په ١٣٩١ لمريز کال کې د شرعياتو په پوهنځي کې پيل شو. اوس مهال د ماسترۍ شپږ پروګرامونه او یو د دکتورا پروګرام ددې پوهنتون په څلورو پوهنځيو کې فعال دي، چې په یادو پروګرامونو کې د هېواد د بېلابېلو پوهنتونونو او د علمي او دیني مراکزو د علمي کادرونو په ګډون ۴۸۱ تنه په زده کړو بوخت دي او ۸۹۰ تنه یې فارغ کړي، چې د فارغانو په منځ کې نږدې ۳۰۰ تنه د هېواد د بېلابېلو دولتي او خصوصي پوهنتونونو استادان او د علمي کادر غړي دي.
