د لوړو زده کړو وزارت د تضمین کیفیت ریاست پلاوي د ننګرهار پوهنتون له مشرتابه سره وليدل
د لوړو زده کړو وزارت د تضمین کیفیت ریاست ارزوونکي پلاوي د کابل پوهنتون د استاد پوهندوی ډاکتر خان محمد احمدزي په مشرۍ د ننګرهار پوهنتون له رئيس پوهاند دوکتور خليل احمد بهسودوال سره وليدل.
په ياده لیدنه کې، چې د علمي چارو مرستیال پوهندوی دوکتور محمد حامد کډوال، د محصلانو چارو مرستيال پوهندوى سيد اکرم هاشمي، د اداري او مالي چارو مرستیال حمیدالله احمدزي او د پوهنتون د تضمین کیفیت داخلي واحد مسؤل پوهنمل لطیف الله غفوري هم په کې حضور درلود، دواړو خواوو د بشپړ اکاډمیک اعتبار اخیستنې په درېیم پړاو کې د ننګرهار پوهنتون د ارزونې په اړه بحث او خبرې اترې وکړې.
د ننګرهار پوهنتون رئیس پوهاند دوکتور خلیل احمد بهسودوال راغلي پلاوي ته د ښه راغلاست تر څنګ د پوهنتون د اوس مهالي علمي، تدریسي او اداري وضعیت او همدارنګه د پوهنتون د لاسته راوړنو او راتلونکو پروګرامونو په اړه ترتیب کړی پریزنټیشن وړاندې کړ.
نوموړي وویل: د ننګرهار پوهنتون د ادارې، اړوندو پوهنځيو او ټولو څانګو فعالیتونه د لوړو زده کړو وزارت د لوایحو او مقرراتو او د تضمین کیفیت له اصولو سره برابر پر مخ ځي او د بشپړ اکاډمیک اعتبار اخیستنې په موخه د درېیم پړاو ارزونې لپاره چمتووالی لري.
د تضمین کیفیت د راغلي پلاوي مشر پوهندوی ډاکتر خان محمد احمدزي د پوهنتون د چارو په معیاري کېدو خوښي وښوده او زیاته یې کړه، چې د راتلونکو څلورو ورځو په جریان کې به د خپلو همکارانو په مرسته او ملتیا د پوهنتون د ادارې، اړوندو پوهنځیو او څانګو چارې او فعالیتونه د ارزونې په موخه له نږدې وڅاري او راپور به یې د لوړو زده کړو وزارت د کیفیت د تضمین ریاست سره شریک کړي.
