د اسلامي امارت د لوړو زده کړو کمېسون مسؤلینو د ننګرهار پوهنتون مشرتابه سره د پېژندنې غونډه وکړه.
د افغانستان د اسلامي امارت د لوړو زده کړو کمېسون د ننګرهار ولایت مسؤل محمد شاکر وحیدي د یوه پلاوي په مشرۍ د ننګرهار پوهنتون رئیس پوهاند دوکتور خلیل احمد بهسودوال، د علمي چارو او محصلانو چارو مرستیالانو، د بېلابېلو پوهنځیو او تدریسي روغتون رئیسانو او ځینو اداري آمرینو سره لیدنه وکړه او د پوهنتون په اړوندو مسایلو یې بحث او خبرې وکړې.
د ننګرهار پوهنتون رئيس پوهاند دوکتور خليل احمد بهسودوال راغلي پلاوي ته د ښه راغلاست ویلو تر څنګ د پوهنتون د اکاډمیکو فعاليتونو او لاسته راوړنو په اړه معلومات ورکړل.
نوموړي وويل: ننګرهار پوهنتون د ۱۳ پوهنځیو، ۷۷ څانګو، ۱۵ زره تنو محصلینو، ۹۵۰ تنو استاذانو او اداري کارکوونکو، د لیسانس او شپې پوهنځیو پروګرامونو سربېره د ماسترۍ او دکتورا د ۶ برنامو، ۶ علمي مجلو، علمي او تحقیقاتي مرکزونو په لرلو سره د هېواد په کچه دویم ستر علمي او اکاډميک مرکز دى، چې په تېر ۵۸ کلن عمر کې يې څه دپاسه ۳۵ زره تنه علمي او مسلکي کادرونه د ليسانس، ماستر او ډاکټر په سويه ټولنې ته د خدمت په موخه وړاندې کړي او لا هم په پوره ژمنتیا پر دې ډګر چټک ګامونه اخلي.
نوموړي زياته کړه: پوهنتون د یادو لاسته راوړنو سره سره یو شمېر ستونزې هم لري، چې د علمي کادر بستونو کموالى، د بوديجې کمښت، د پوهنتون د ٦٤ هکټاره ځمکې استملاک او د درسي خونو او ودانيو کموالى هغه څه دي، چې د دې پوهنتون د لا زیات پرمختګ مخه يې ډب کړې ده.
د پوهنتون رئيس د افغانستان د اسلامي امارت له خوا په سوله ییز ډول د واک د ترلاسه کولو ستاینه وکړه او هیله یې څرګنده کړه، چې یاد اوښتون به په ګران هېواد کې د تلپاتې سولې او پرمختګ سبب وګرځي.
د اسلامي امارت د لوړو زده کړو کمېسون د ننګرهار ولایت مسؤل محمد شاکر وحیدي ننګرهار پوهنتون له کابل وروسته دويم ستر پوهنتون وباله او په دې وروستيو کې يې د نوموړي پوهنتون د علمي پرمختګ او لاسته راوړنو په اړه د خوښۍ څرګندونه وکړه.
نوموړي د ننګرهار پوهنتون مشرتابه او استادانو ته ډاډ ورکړ، چې د پخوا په څېر دې خپلو دندو ته دوام ورکړي او زیاته یې کړه، چې د پوهنتونونو د پیل په اړه د امارت د مشرانو پرېکړې ته په تمه یو.
ښاغلي وحیدي وویل، چې د حالاتو تر سمېدو وروسته به د ننګرهار پوهنتون ستونزې د لوړو زده کړو د مرکزي کمېسون له مشرانو او اړوندو ادارو سره مطرح کړي او د حل په موخه به يې لازم اجراات ترسره کړي.