د ننګرهار پوهنتون له لوري د جوړېدونکي ملي کنفرانس علمي کمېټې نوبتي غونډه وکړه.
د ننګرهار پوهنتون له خوا ( د هېواد په پوهنتونونو کې د اسلامي ثقافت تدریس، ارزښت او اغېزې) تر سرلیک لاندې د جوړېدونکي ملي کنفرانس علمي کمېټې د پوهنتون د علمي چارو مرستیال په مشرۍ غونډه وکړه، چې په کې د شرعیاتو پوهنځي رهبرۍ، د څانګو آمرینو او استادانو ګډون کړی و.
د یادې غونډې پر مهال د ۱۰ نویو ترلاسه شویو مقالو ارزونه او بیا کتنه وشوه او همدارنګه د کنفرانس د موضوعاتو په ترتیب، بشپړتیا او د کمېټې اړوند فعالیتونو په وخت ترسراوي او ښه والي باندې بحثونه او نظریات وړاندې شول.
د ننګرهار پوهنتون د علمي چارو مرستیال پوهندوی مولوي احسان الله ناصح په خپلو خبرو کې د کنفرانس د علمي کمېټې له غړو مننه وکړه، چې په منظم شکل مجلسونو کې برخه اخلي او د چارو په ترسره کولو کې فعال دي.
نوموړي زیاته کړه: چې د کنفرانس علمي کیفیت لوړتیا او اغېزمنتیا لپاره باید د ټاکل شوي طرزالعمل له مخې هڅې ترسره او د کنفرانس مربوطه مقالې د سمې ارزونې وروسته تائید شي.
د غونډې پر مهال د هر محور مقالو کتنې لپاره د کمېټو په جوړولو، د مقالو له لیکوالانو د مقالې لنډیز غوښتنې او نورو موضوعاتو په اړه د غونډې ګډونوالو نظریات شریک کړل.
د یادونې وړ ده، چې د ننګرهار پوهنتون له خوا جوړېدونکي دې کنفرانس ته د روانې جدي میاشتې تر ۳۰ مې نېټې مقالې منل کېږي.
