د ننګرهار پوهنتون د ژورنالېزم او ارتباطاتو پوهنځي د ۴ کادري بستونو لپاره له ۳۴ تنو کاندیدانو ازموینه واخیستل شوه.
یاده ازموینه د غويي په ۳۱مه نېټه د امام ابوحنیفه (رح) په تالار کې په داسې حال کې واخیستل شوه، چې د پوهنتون د مشرتابه، مرستیالانو او د ژورنالېزم پوهنځي د مسؤلینو او استادانو سربېره د لوړو زده کړو وزارت علمي معین دوکتور لطف الله خیرخواه هم حضور درلود.
د ننګرهار پوهنتون رئیس پوهاند دوکتور خلیل احمد بهسودوال د ازموینې ګډونوالو ته ډاډ ورکړ، چې د لوړو زده کړو وزارت د علمي چارو د قدرمن معین صاحب د مستقیم نظارت او لارښوونو په رڼا کې یې د ژورنالېزم پوهنځي د استاذانو او ټاکل شوي ممتحنه هیئت سره په ګډه د ازموينې د روڼتیا او شفافیت په برخه کې تر ممکنه حده هلې ځلې کړي دي.
نوموړي د ازموینې پروسې په اړه کاندیدانو ته معلومات ورکړل او زیاته یې کړه، چې ازموینه به په تمامه معنی شفافه واخلي او د عدالت له مخې به حق حقدار ته وسپاري.
د لوړو زده کړو وزارت علمي معین دوکتور لطف الله خیرخواه، د ننګرهار پوهنتون رئیس پوهاند دوکتور خلیل احمد بهسودوال، د لوړو زده کړو وزارت فوق العاده استازي قاضي خالد صداقت او د علمي چارو مرستیال پوهنمل احسان الله ناصح د ازموینې بهیر څخه لیدنه وکړه او د لیدنې پر مهال یې استادانو ته سپارښتنه وکړه، چې ګډونوالو کاندیدانو ته په ښه توګه لارښوونه وکړي او ازموينه دې د علمي نورمونو او اصولو سره سمه واخلي، چې د هغوی له خوا د اجرااتو ډاډ ورکړل شو.
