د ننګرهار پوهنتون اداري مجلس ددې پوهنتون د رئيس پوهاند دوکتور خليل احمد بهسودوال په مشرۍ غونډه وکړه.
په نوموړې کاري ناسته کې، چې د پوهنتون د علمي چارو مرستيال پوهنمل احسان الله ناصح، د محصلانو چارو مرستيال پوهنوال سيد اکرم هاشمي، د پوهنځيو او تدریسي روغتون رئيسانو، مرستیالانو او ځینو اداري آمرینو په کې برخه لرله، د پوهنتون د مالي، اداري، تدریسي او يو شمېر نورو مسايلو په اړه بحث او خبرې وشوې.
د روژې په مبارکه میاشت کې د درسي مهال وېش تغیر، د ښوونې او روزنې پوهنځي په نوښت په پوهنتون کې د رواني او تحصیلي مشاورې مرکز ایجاد، د پوهنتون د قراردادونو او لیلیې اړوند مسایل، په مرکزي کمپس کې د نقلیه وسایطو د ساتنې په موخه د ترانسپورت مدیریت طرزالعمل ته کتنه، د پوهنتون د انکشاف لپاره د یوې کمېټې ټاکل او یو شمېر نور متفرقه مسایل هغه څه وو، چې د مجلس پر مهال پرې بحث او په اړه یې پرېکړې وشوې.
