ننګرهار پوهنتون کې د ارواښاد استاد پوهاند سبحاني د فاتحې مراسم ترسره شول.
د ننګرهار پوهنتون د اقتصاد پوهنځي د ملي اقتصاد څانګې متقاعد استاد ارواښاد پوهاند ګلاب شاه سبحاني د فاتحې مراسم ددې پوهنتون د ادارې، استادانو او د ارواښاد د کورنۍ له خوا د پوهنتون د مرکزي لیلیې په جامع مسجد کې ترسره شول.
په يادو مراسمو کې د ننګرهار پوهنتون د رئیس، مرستیالانو، د بېلابېلو پوهنځیو رئیسانو، استادانو، محصلینو او اداري کارکوونکو سربېره د بېلابېلو تحصیلي موسسو مسؤلینو، استادانو او د ارواښاد استاد دوستانو او خپلوانو برخه واخیسته.
د ننګرهار پوهنتون رئيس پوهاند دوکتور خليل احمد بهسودوال د ارواښاد استاد مړینه لویه غمیزه او د ننګرهار پوهنتون لپاره نه جبرانېدونکې ضایعه وبلله.
نوموړي د پوهاند سبحاني په شخصیت، علمي ژوند او خدمتونو رڼا واچوله او زیاته یې کړه، چې ارواښاد استاد څه دپاسه څلور لسیزې د هېوادوالو په خدمت او د اقتصاد په برخه کې د هېواد د علمي کادرونو په روزنه کې تېره کړه.
پوهاند بهسودوال د پوهنتون د استادانو، محصلینو، اداري کارکوونکو او د فاتحې له ټولو ګډونوالو مننه وکړه، چې د ارواښاد استاد په وير راټول شول او نوموړي ته يې د دعا لاسونه لپه کړل.
