د ننګرهار پوهنتون اداري مجلس ددې پوهنتون د رئيس پوهاند دوکتور خليل احمد بهسودوال په مشرۍ ترسره شو.
په نوموړې کاري ناسته کې د پوهنتون د علمي چارو مرستيال پوهندوى دوکتور محمد حامد کډوال، د محصلانو چارو مرستيال پوهنوال سيد اکرم هاشمي، د اداري او مالي چارو مرستیال مسعود پیروزي، د پوهنځيو او تدریسي روغتون رئيسانو، مرستیالانو او اداري آمرينو په کې برخه لرله، چې د پوهنتون د مالي، اداري، تدریسي او يو شمېر نورو مسايلو په اړه په کې بحث او خبرې اترې وشوې.
د مجلس د پرانیستې وینا پر مهال د ننګرهار پوهنتون رئیس پوهاند دوکتور خلیل احمد بهسودوال د لومړني سمستر د پای ازموینو د شفافیت او روڼتیا په اړه د پوهنځیو مسؤلینو ته لازم هدایات او لارښوونې وکړې.
نوموړي وویل، چې ازموینې دې د ازموینو کمېټې د کړنلارې سره سم، چې له وړاندې پوهنځیو سره شریکه شوې، په راڼه او شفاف ډول واخیستل شي او پایلې دې په خپل وخت له محصلینو سره شریکې شي.
د اداري او مالي چارو مرستیال مسعود پیروزي خپل راتلونکي پلانونه او کاري لومړیتوبونه د مجلس له غړو سره شریک کړل او په مالي او خدماتي برخو کې یې د پوهنځیو شته ستونزو د رسیده ګۍ ژمنه وکړه.
د مجلس په پای کې په یو لړ نورو متفرقه مسایلو بحث او خبرې وشوې او له پرېکړو وروسته اړوندو څانګو ته محول شول.
