ننګرهار پوهنتون کې د پایلو پر بنسټ او محصل محورۍ (OBE-SCL) تدریسي تګلارو د زده کړې ۱۲ ورځنی ورکشاپ پای ته ورسېد.
یاد ورکشاپ د پوهنتون د مسلکي زده کړو پرمختیایي مرکز (PDC) په نوښت جوړ شوی ؤ، چې د ننګرهار پوهنتون د اړوندو پوهنځیو ۱۵ تنه استادان په کې وروزل شول.
د ننګرهار پوهنتون رئيس پوهاند دوکتور خلیل احمد بهسودوال د ورکشاپ د پای مراسمو کې د پایلو پر بنسټ او محصل محورۍ زده کړو تدریسي تګلارو (OBE-SCL) په اړتیا او اهمیت خبرې وکړې او زیاته یې کړه، چې د پوهنتون اداره هڅه کوي، چې د تدریس د دودیزو تګلارو پر ځای نړیوالې معیاري تګلارې عامې کړي.
پوهاند بهسودوال د مسلکي زده کړو د پرمختیايي مرکز او د ورکشاپ د روزونکو استادانو څخه د مننې تر څنګ له برخوالو استادانو غوښتنه وکړه، چې ترلاسه شوي مهارتونه د خپلو اړوندو پوهنځیو او څانګو له استادانو سره هم شریک کړي.
د ننګرهار پوهنتون د مسلکي زده کړو پرمختیایي مرکز مسؤل پوهندوی احمد فرید روان د ورکشاپ ارزونه وکړه او زیاته یې کړه، چې د پوهنتون د محترم مشرتابه په ملاتړ به په راتلونکې کې د نورو استادانو لپاره ورته ورکشاپونه دایر کړي.
د پروګرام په وروستۍ برخه کې د ننګرهار پوهنتون د رئیس او علمي چارو مرستیال له خوا د ورکشاپ روزونکو پوهنمل دوکتور محمد دوست صافي، پوهنمل جاوید صاحبزاده او په ننګرهار پوهنتون کې د HEDP ادارې مسؤل عثمان صافي ته ستاینلیکونه او د ورکشاپ برخوالو استادانو ته سندونه ورکړل شول.
