د ننګرهار پوهنتون د فارغانو ټولنې مسؤلینو غونډه وکړه
د ننګرهار پوهنتون د فارغانو ټولنې مسؤلینو ددې پوهنتون د محصلانو چارو مرستیال پوهندوی سید اکرم هاشمي په مشرۍ غونډه وکړه.
په نوموړي کاري ناسته کې، چې د ټولنې مشر انجنیر خان محمد دوست، مرستیالانو ډاکتر حسیب الله تره کي او یار احمد جمال او یو شمېر غړو هم حضور درلود، په رسمي توګه د ټولنې د پرانیستې، راتلونکو غونډو او پروګرامونو، د فارغانو د انسجام او یو شمېر نورو مسایلو په اړه بحث او خبرې اترې وشوې.
د فارغانو ټولنې مشر انجنیر خان محمد دوست له عدلیې وزارت څخه د ټولنې د رسمي کېدو او د کړنو جواز اخیستلو او همدارنګه د راتلونکو پلانونو په اړه د مجلس برخوالو ته معلومات ورکړل.
د ننګرهار پوهنتون د محصلانو چارو مرستیال پوهندوی سید اکرم هاشمي د ټولنې په رسمي کېدو د خوښۍ څرګندونه وکړه او د ټولنې مسؤلینو ته یې په چارو کې د مرستې او همکارۍ ډاډ ورکړ.
