د لوړو زده کړو محترم وزیر صاحب ننګرهار پوهنتون کې د ۲۲ سوه تنو محصلینو په فراغت غونډه کې ګډون او وینا وکړه.
د ننګرهار پوهنتون اړوندو پوهنځیو څخه ۲۲ سوه تنه مسلکي کادرونه فارغ او د یوې شانداره غونډې په ترڅ کې ورته د فراغت سندونه ورکړل شول.
په همدې موخه جوړه شوې غونډه کې د لوړو زده کړو وزیر صاحب، ننګرهار والي، ولایتي ادارې رئیسانو، نظامي مسؤلینو، د ننګرهار پوهنتون رهبرۍ، پوهنځیو مسؤلینو،استادانو، خصوصي تحصیلي نهادونو او شرکتونو استازو، علماء کرامو او د فارغانو د کورنیو غړو ګډون کړی و.
د ننګرهار پوهنتون عمومي رئیس شیخ انعام الله مدني د غونډې ګډونوالو ته له هرکلي ویلو وروسته د پوهنتون په تاریخچې، فتحې وروسته پرمختګونو، لاسته راوړنو، علمي برنامو، رغنیزو چارو او د پوهنتون راتلونکو پلانونو په هکله خبرې وکړې او فارغانو ته یې سپارښتنه وکړه، چې په اخلاص د خلکو خدمت وکړي او د ترلاسه کړې پوهې حق ادا کړي.
د لوړو زده کړو محترم وزیر شیخ الحدیث مولوي نداء محمد ندیم په خپلو خبرو کې په پوهنتوني دوره کې د فارغانو زحمت ویستل او سختیو سره مقابله وستایله، هغوی ته یې په خپلو مسلکونو کې د تخصص او لا زیاتې پوهې ترلاسه کولو سپارښتنه وکړه او ډاډ یې ورکړ، چې اسلامي امارت د مسلکي کادرونو جذب او ورته د کار زمینې برابرولو ته ژمنتیا لري او حتماً به ورته د خدمت موقع ورکړل شي.
محترم شیخ صاحب زیاته کړه، محصلین او فارغ کادرونه باید د اسلام مبارک دین فرایضو او احکامو په رڼا کې خدمت ترسره کړي، د پیاوړي ایمان، اخلاقو او نېکو اعمالو ځانګړتیاوې خپلې کړي او خپل علم د وطن ابادۍ او ولس هوساینې لپاره په پوره صداقت او مسؤلیت وکاروي.
قدرمن وزیر صاحب همدارنګه وویل، اسلامي امارت د دین، مملکت او ملت ساتنې فکر لري، یوازینۍ هیله یې د افغانانو پرمختګ او سوکالي ده او ټول باید د دې بې بدیله نظام ملاتړ وکړو، چې تر منځ مو اتحاد او اتفاق لا پیاوړی شي.
د ننګرهار ولایت د علماوو شورا رئیس شیخ حضرت جان حنفي، د جهادي مدرسې مهتمم شیخ نور محمد ثاقب او د ۲۰۱ خالد بن ولید (رض) قل اردو مرستیال مولوي محمد نظامي د غونډې نور ویناوال وو چې د علم په ارزښت یی خبرې وکړې، محصلینو ته یې بېلابېلو برخو کې لارښوونې وکړې او د فارغانو په روزلو او ورته امکاناتو برابرولو کې یې د لوړو زده کړو وزارت مشرتابه، ننګرهار پوهنتون رهبرۍ او استادانو له هڅو مننه وکړه.
د غونډې په وروستۍ برخه کې د پوهنتون ادارې او فارغانو له خوا د لوړو زده کړو قدرمن وزیر صاحب ته د غوره خدمتونو ترسره کولو له کبله د اعزاز لونګۍ او د خدمت ایوارډ ورکړل شو.
یاده فراغت غونډه فارغانو ته د سندونو په ورکولو او دعا سره پای ته ورسېده.
سرچینه: د اطلاعاتو، نشراتو او عامه اړیکو امریت
