ننګرهار پوهنتون کې د ختیځ امارتي او خصوصي پوهنتونونو سلګونو تنو محصلینو ته ۶ ورځنی دیني او علمي سيمینار پیل شو.
د لوړو زده کړو وزارت محترم مقام په لارښوونه او د ننګرهار پوهنتون په کوربتوب د ننګرهار او لغمان امارتي او ننګرهار مېشتو بېلابېلو خصوصي پوهنتونونو نږدې ۵۰۰ تنو محصلینو ته ۶ ورځنی دیني ـ علمي سيمینار پیل شو، چې پر مهال به یې د هېواد جیدو علماوو او شیوخ کرامو له خوا دیني، عقیدوي، فکري، تربیوي او اصلاحي موضوعات تدریس او ارایه شي.
د سيمینار د پرانیستې وینا پر مهال د ننګرهار پوهنتون رئیس شیخ انعام الله مدني د سيمینار په ارزښت او موخو خبرې وکړې او ګډونوال محصلین یې وهڅول، چې په خپل فعال ګډون سره ارایه کېدونکي موضوعات په ښه توګه زده او په خپل ورځني ژوند کې عملي کړي.
د ختیځ زون امارتي او خصوصي پوهنتونونو لپاره د لوړو زده کړو وزارت د دعوت او ارشاد مسؤل او د ننګرهار پوهنتون د محصلانو چارو مرستیال شیخ شاکر الله وحدت په خپله وینا کې وویل، د محصلینو دیني، مسلکي او فکري روزنه ورته لومړیتوب لري او یاد سيمینار یې د لوړو زده کړو محترم وزیر شیخ صاحب په مستقیمې لارښوونې جوړ کړی دی.
نوموړي د جوړ شوي ۶ ورځني سيمینار د ترتیب او اجنډا په اړه محصلینو ته معلومات وړاندې کړل او هغوی یې خپلو دیني او مسلکي مسؤلیتونو ته متوجه کړل.
د فکري روزنې او ظرفیت لوړونې په موخه جوړ شوي د دې سيمینار د اولې ورځې په لومړۍ برخه کې د ننګرهار پوهنتون رئیس شیخ انعام الله مدني مجاهدینو ته د عالیقدر امیرالمؤمنـین (حفظه الله تعالی) لارښوونې، د ختیځ زون امارتي او خصوصي پوهنتونونو لپاره د لوړو زده کړو وزارت د دعوت او ارشاد مسؤل او د ننګرهار پوهنتون د محصلانو چارو مرستیال شیخ شاکر الله وحدت ولاء او براء، د مخدره توکیو اضرار او د اسلامي امارت پر پرېکړو اعتماد او د ننګرهار ولایت د علماوو شورا مشر شیخ القران والحدیث مولوي حضرت جان حنفي د امام ابوحنیفه (رحمه الله) مناقب او د هغه د مذهب تدوین او تقلید موضوعات ارایه او د محصلینو پوښتنې یې ځواب کړې.
ټاکل شوې ده، چې د غرمنۍ او لمانځه وقفې وروسته به ( د اسلامي نظام اهمیت، فوائد او بیعت ته د انسانانو اړتیا، فقه العبادات، د عالیقدر امیرالمؤمنین (حفظه الله تعالی) کتاب د شرعي نظام په استحکام کې د اطاعت اغېزې) موضوعات د شیخ شاکرالله وحدت، د ننګرهار پوهنتون د علمي چارو مرستیال مولوي احسان الله ناصح او د پوهنتون د دعوت او ارشاد آمر مولوي خلیل الله معصوم له لوري ارایه شي.
