د ننګرهار پوهنتون طب او ستوماتولوژي پوهنځیو کې د پاک کارۍ کمپاین ترسره شو.
د ننګرهار پوهنتون طب پوهنځي فرهنګي کمېټې نوي سمستر ته د چمتووالي په موخه د استادانو، اداري او خدماتي کارکوونکو او د ښاروالۍ تنظیفاتي پرسونل په مرسته طب او ستوماتولوژي پوهنځیو کې د پاکوالي او چاپېریال ساتنې کمپاین ترسره کړ.
د یاد کمپاین په ترڅ کې برخه والو د پوهنځیو درسي خونې، انګړ او چاپېر ټول ځایونه پاک او منظم کړل، چې په دې توګه یاد پوهنځي د جدیدالشمول محصلینو راتګ او نوي سمستر ته اماده شول.
د ننګرهار پوهنتون طب پوهنځي رئیس پوهنمل ډاکتر زلمي صاحبزاده د کمپاین پرانیستې پر مهال د نظافت په ارزښت خبرې وکړې، د پوهنځیو په پاک او منظم ساتلو کې یې د ټولو منسوبینو هڅې او همکاري مهمه وبلله او له هغوی یې د مننې تر څنګ ټینګار وکړ، چې په دوامداره توګه باید ورته کړنې او هڅې ترسره شي.
په پای کې د پوهنځیو پاکوالي او نظم په موخه د دوامداره اشرونو ترسراوي ژمنه وشوه.
