ننګرهار پوهنتون د علماوو شورا او جهادي مدرسې استادانو ته د علمي مقالې لیکنې په اړه ورکشاپونه دایر کړل.
د ننګرهار پوهنتون څېړنو او علمي مجلو معاونیت له خوا د دې ولایت د علماوو شورا غړو او د ننګرهار جهادي مدرسې استادانو ته (د علمي مقالې لیکنې اصول او تګلارې) تر عنوان لاندې یو ورځني ورکشاپونه دایر شول.
یاد ورکشاپونه، چې موخه ترې د دیني علماء کرامو او مدرسینو د څېړنیزو مهارتونو پیاوړتیا او د معیاري علمي لیکنې اصولو ښودنه وه، د ننګرهار پوهنتون دوو تنو استادانو له خوا د علماوو شورا او یادې دیني مدرسې په تالارونو کې وړاندې شول.
ورکشاپونو ته په ویناوو کې د ننګرهار پوهنتون د څېړنو او علمي مجلو مرستیال پوهندوی دوکتور سعید محمد وقار د څېړنې په ارزښت خبرې وکړې، د ورکشاپ اهمیت یې بیان کړ او علماء کرام یې وهڅول چې خپله اړونده برخه کې معیاري تحقیقات ترسره کړي.
د ننګرهار پوهنتون د څېړنو آمر پوهنمل دوکتور حکیم خان حقیار او د حقوقو او سیاسي علومو پوهنځي استاد پوهنمل دوکتور نورالله نوري د ورکشاپونو پر مهال ګډونوالو ته د علمي مقالو لیکنې تګلارې، اصول، کیفیت، موخې، فارمټ، ډیزاین او نور مسایل تشریح کړل او د هغوی پوښتنې یې ځواب کړې.
همدارنګه د یادو ورکشاپونو پر مهال د وردګو پوهنتون راتلونکي ملي کنفرانس مقالو په فارمټ، ډیزاین او محورونو هم تفصيلي بحث او معلومات وړاندې شول.
د ننګرهار ولایت د علماوو شورا مشر شیخ القران والحدیث مولوي حضرت جان حنفي او د ننګرهار جهادي مدرسې مهتمم مولوي ریاض الله حقاني د یادو ورکشاپونو جوړولو له کبله ننګرهار پوهنتون څخه مننه وکړه او راتلونکي کې یې د ورته نورو همکاریو غوښتنه وکړه.
