د ننګرهار پوهنتون محصلینو ته د پروپوزل، مونوګراف او تېزس لیکنې ۳ ورځنی ورکشاپ پای ته ورسېد.
یاد ورکشاپ د ننګرهار پوهنتون د څېړنو او علمي مجلو معاونیت او محصلانو خدمتونو همغږۍ امریت له خوا د بېلابېلو پوهنځیو (۴۵) تنو محصلینو ته د پوهنتون مسلکي زده کړو پرمختیايي مرکز (PDC) کې جوړ شوی و.
د ورکشاپ پر مهال محصلینو ته د روزونکو استادانو له لوري د پروپوزل، مونوګراف او تېزس لیکنې ټول علمي او مسلکي اړخونه تشریح او پر هغوی یې عملي تمرینونه ترسره کړل.
ورکشاپ کې همداراز د یادو موضوعاتو اړوند اړین بحثونه او د محصلینو پوښتنې هم ځواب شوې.
د یاد ورکشاپ د روزنې چارې د ننګرهار پوهنتون د څېړنو او علمي مجلو مرستیال پوهندوی دوکتور سعید محمد وقار، د ژبو او ادبیاتو پوهنځي استاد پوهنمل دوکتور فهیم رحیمي او د ساینس پوهنځي استاد پوهنمل عارف الله ضیاء ترسره کړې.
ورکشاپ ګډونوالو محصلینو ته د سندونو په ورکړې سره پای ته ورسېد.
