ننګرهار پوهنتون کې د فوټبال سیالۍ د ژورنالېزم او ارتباطاتو پوهنځي په بریا پای ته ورسېدې.
د فوټبال سياليو یاد ټورنمنټ درې اوونۍ وړاندې د ننګرهار پوهنتون د سپورت او بدني روزنې آمريت له خوا ددې پوهنتون د اړوندو پوهنځيو لوبډلو ترمنځ پیل شوی و.
د پوهنتون د سپورت او بدني روزنې آمر محمد نسیم کاکړ په وینا، د سیالیو پایلوبې ته د ژورنالېزم او ارتباطاتو او ژبو او ادبیاتو پوهنځیو لوبډلو لار پیدا کړه، چې د ژورنالېزم او ارتباطاتو پوهنځي لوبډلې وکولای شو، ۵ د ۴ پر وړاندې ګولونو وهلو سره د یادو سیالیو اتلولي په خپل نوم کړي او لومړی مقام وګټي.
د ټورنمنټ د پای په مراسمو کې د ننګرهار پوهنتون د محصلانو چارو مرستیال سربېره د مختلفو پوهنځیو رئیسانو، استادانو، آمرینو او اداري کارکوونکو برخه لرله، چې د سیالیو ګټونکې لوبډلې او غوره لوبغاړو ته یې ستاینلیکونه، کپونه، مډالونه او نورې ډالۍ ورکړې.
