د ننګرهار پوهنتون علمي شورا نوبتي غونډه وکړه.
په نوموړې کاري ناسته کې، چې د ثور په ۱۵ نېټه د کرنې پوهنځي د غونډو په نوي تالار کې ترسره شوه او د پوهنتون رئیس، مرستیالانو، د بېلابېلو پوهنځيو او تدریسي روغتون رئیسانو او استادانو په کې برخه لرله، د علمي او تدریسي چارو، علمي ترفیعاتو، تقرر او انفکاک کیسونو او يو شمېر نورو موضوعاتو په اړه بحث او پرېکړې وشوې.
د ننګرهار پوهنتون رئيس شیخ انعام الله مدني د مجلس د پرانیستې پر مهال په تېره یوه میاشت کې ددې پوهنتون د فعالیتونو او لاسته راوړنو راپور د شورا له غړو سره شریک کړ.
نوموړي په ځانګړې توګه د اسلامي ثقافت ملي کنفرانس د بریالي ترسراوي یادونه وکړه، چې د اسلامي امارت د زعیم امیرالمؤمنین شیخ صاحب (حفظه الله) په ګډون ترسره شو، چې دا یې د اقلیم بدلون د نړیوال کنفرانس وروسته دویمه ستره علمي او تاریخي لاسته راوړنه وبلله.
د علمي چارو مرستیال پوهندوی مولوي احسان الله ناصح، د محصلانو چارو مرستیال پوهنیار حافظ سید محمدقاسم هاشمي، د څېړنو او علمي مجلو مرستیال پوهندوی دوکتور سعید محمد وقار او د اداري او مالي چارو مرستیال حافظ ناکیم ځدراڼ د غونډې نور ویناوال وو، چې د تضمین کیفیت د درېیم پړاو بیاځلي ارزونې لپاره د چمتووالي، د سمستر نهايي ازموینو لپاره د اړینو تدابیرو نیولو، د ټولنې ستونزو ته په کتو د علمي تحقیقاتو ترسراوي لپاره د ۵ کلنې ستراتېژۍ جوړولو، د ازموینو مرکزي کمېټې د نویو غړو تائید، د قراردادي استادانو د تقرر او ځینو نورو موضوعاتو په اړه څرګندونې وکړې او مسؤلینو او د شورا غړو ته یې لازمې لارښوونې وکړې.
د مجلس په وروستۍ برخه کې د ننګرهار، لغمان، کونړ او سلام پوهنتونونو د علمي ترفیعاتو ۱۲ او د تقرر او انفکاک ۲ کیسونه مطرح او په اړه یې لازمې پرېکړې وشوې.
