د ننګرهار مېشتو خصوصي پوهنتونونو او لوړو زده کړو مؤسسو مسؤلینو د ننګرهار پوهنتون علمي چارو مرستیال سره غونډه وکړه.
یاده غونډه چې د ننګرهار پوهنتون په ریاست مقام کې ترسره شوه، پر مهال یې په خصوصي پوهنتونونو کې د علمي کادر د جذب پروسو تسریع، د اکاډمیکو فعالیتونو کیفیت، متقابلو همکاریو پراختیا، د خصوصي پوهنتونونو موجوده ستونزو حل او راتلونکو پلانونو باندې بحث او خبرې وشوې.
د ننګرهار پوهنتون د علمي چارو مرستیال پوهندوی مولوي احسان الله ناصح د مجلس د پرانیستې وینا پر مهال د لوړو زده کړو معیاري کېدا او څېړنیزو فعالیتونو کیفیت لوړاوي برخه کې هڅې ترسره کول د ټولو خصوصي او دولتي پوهنتونونو مکلفیت وباله او هغوی ته یې د اصولو په رڼا کې د چارو ترسراوي سپارښتنه وکړه.
نوموړي په نوبتي شکل د ټولو خصوصي پوهنتونونو ستونزې واورېدلې او د حل ډاډ یې ورکړ.
د غونډې پر مهال د خصوصي پوهنتونونو مسؤلینو د ننګرهار پوهنتون له دایمي اکاډمیکو همکاریو مننه وکړه او خپل راتلونکي پلانونه یې د ننګرهار پوهنتون علمي چارو مرستیال سره شریک کړل.
د غونډې په وروستۍ برخه کې د خصوصي پوهنتونونو او لوړو زده کړو مؤسسو راتلونکو کانکور ازموینو ته د لازمو تدابیرو نیولو او چمتووالي باندې بحث او نظریات شریک شول.
