ننګرهار پوهنتون کې محصلینو ته (په عامه ادارو کې د کاري فرصتونو لوړول) تر سرلیک لاندې سيمینار ارایه شو.
د مسؤلینو په وینا، له دې سيمینار څخه یې موخه د کارکوونکو چارو مدیریت اړوند تیوریکي درسونو ته د عملي ساحې سره اړیکه ورکول دي.
یاد سيمینار د لغمان ولایت د تخنیکي او مسلکي زده کړو امریت اړوند د کارکوونکو چارو عمومي مدیر ښاغلي خوشحال احرار رئیس خېل له لوري د عامه ادارې او پالیسۍ پوهنځي د درېیم او څلورم ټولګیو لسګونه تنو محصلینو ته د پوهنتون د غونډو په تالار کې په داسې حال کې وړاندې شو، چې د یاد پوهنځي د رئیس او استادانو سربېره په کې د محصلانو خدمتونو انسجام امریت مسؤلینو برخه لرله.
د سيمینار د پرانیستې وینا پر مهال د عامه ادارې او پالیسۍ پوهنځي رئیس پوهنمل حافظ محمد جمال شینواري د یاد سيمینار په اهمیت او ارزښت خبرې وکړې او د دغه ډول سيمینارونو دایرول یې د محصلینو په عملي زده کړو او روزنه کې اغېزمن وبلل.
نوموړي د ښاغلي رئیس خېل څخه مننه وکړه او محصلینو ته یې سپارښتنه وکړه، چې د سيمینار له موادو او مطالبو اعظمي استفاده وکړي.
د سيمینار په دویمه برخه کې ښاغلي احرار رئیس خېل د موضوع اړوند پرېزنټېشن ارایه کړ،چې په کې عامه ادارو کې د کاري فرصتونو لوړولو او اداراتو ته لار پیدا کولو په اړه معلومات وړاندې شول او په یاده برخه کې نوموړي خپلې عملي تجربې د محصلینو سره شریکې کړې.
په پای کې د عامه ادارې او پالیسۍ پوهنځي استاد پوهنمل منصور فقيرزي د سيمینار ارزونه وکړه او هغه یې د محصلینو د ظرفیت لوړونې په اساس مثبت ارزیابي کړ.
