د ښوونې او روزنې پوهنځي محصلینو ته د (څېړنیزې لیکنې کړنلارې) تر سرلیک لاندې سيمینار ارایه شو.
یاد سيمینار ددې پوهنځي د ارواپوهنې او پیداګوژي څانګې استاد پوهنمل دوکتور حکیم خان حقیار له لوري د یادې څانګې د څلورم ټولګي محصلینو ته وړاندې شو.
د سيمینار د پرانیستې وینا پر مهال د ننګرهار پوهنتون د ښوونې او روزنې پوهنځي رئیس پوهنمل محمد اسحق شهیدزوی یاد سيمينار د محصلینو په ظرفیت لوړونه، څېړنیزو فعالیتونو پراختیا او معیاري کېدا کې اړین وباله او محصلینو ته یې سپارښتنه وکړه، چې ددې فرصت څخه په استفادې خپل څېړنیز مهارتونه او پوهه پیاوړې کړي.
نوموړي د استاد حقیار څخه مننه وکړه او د خپل پوهنځي محصلینو ته یې د ورته نورو علمي اقدامات د ترسراوي ژمنه وکړه.
د سيمینار وړاندې کوونکي استاد پوهنمل دوکتور حکیم خان حقیار د موضوع د ارایې پر مهال د څېړنې مفهوم، تعریف، اهمیت، د څېړنې کولو او لیکلو اصولو، مېتودولوژۍ او عملي کړنلارو په اړه معلومات وړاندې کړل او د محصلینو پوښتنې یې ځواب کړې.
