د ننګرهار پوهنتون استادانو او علمي کادر غړو ته یو ورځنی دیني او علمي سيمينار وړاندې شو.
په دې سيمينار کې د یو شمېر دیني متخصصینو او علماوو له لوري ګډونوالو ته پر بېلابېلو دیني موضوعاتو او ټولنیزو ارزښتونو خبرې وشوې او د وخت له غوښتنو سره سم د هغې په تطبیق ټینګار وشو.
د ټولنې د سوکالۍ لپاره په علمي ساحو کې د دیني ارزښتونو تطبیق، ادغام، پیاوړتیا، د استادانو ترمنځ فکري همغږي رامنځ ته کول او د مسؤلیت پزیرۍ احساس ته وده ورکول ددې سيمينار اهداف و.
یاد دیني او علمي سيمينار د ننګرهار پوهنتون ریاست په نوښت او لارښوونه د بېلابېلو پوهنځیو استادانو ته د پوهنتون په جامع مسجد کې وړاندې شو، چې پرمهال یې د ننګرهار پوهنتون مشرتابه، د پوهنځیو رئیسانو، د څانګو امرینو او استادانو برخه لرله.
د سيمینار د پرانیستې وینا پرمهال د ننګرهار پوهنتون رئیس شیخ انعام الله مدني په ټولنه کې د استادانو پر قدر او مقام خبرې وکړې او په دیني، علمي، اخلاقي او ټولنیز پرمختګ کې یې د هغوی رول مهم وباله.
نوموړي د ټولنیزو ننګونو او ستونزو په حل کې د علمي کادرونو هلې ځلې او همکاري اړینه وبلله او ویې ویل، چې استادان باید د ټولنې په اصلاح کې خپل مسؤلیت په سمه توګه ادا کړي.
د سيمینار پر مهال د ننګرهار د جهادي جامعې مهتمم شيخ محب الله عارف د امانت پېژندنه او ساتنه او د ننګرهار ولایت د علماوو شورا غړي شيخ عبدالحي حنفي د نیت اصلاح، اخلاص او تقوی موضوعاتو اړوند خبرې وکړې او د دیني ارشاداتو له مخې یې یاد موضوعات په تفصیلي شکل بیان او د ګډونوالو پوښتنې ځواب کړې.
سيمينار په دعايې سره پای ته ورسېد.
