د ننګرهار پوهنتون ممتاز محصلین د یوې غونډې په ترڅ کې وستایل شول.
ننګرهار پوهنتون د بېلابېلو پوهنځیو د ورځې او شپې برنامو هغه محصلین، چې د تېر سمستر په ازموینو کې یې د لوړو نمرو په اخیستلو سره د خپل پوهنځي د ممتاز محصل مقام خپل کړی و، د یوې غونډې په ترڅ کې وستایل.
په همدې مناسبت د ننګرهار پوهنتون د محصلانو خدمتونو انسجام امریت په نوښت د پوهنتون د غونډو تالار کې ستاینغونډه جوړه شوې وه، چې د پوهنتون د رئیس شيخ انعام الله مدني او محصلانو چارو مرستیال پوهنیار حافظ سید محمد قاسم هاشمي سربېره په کې د پوهنځیو یو شمېر مسؤلینو، استادانو او اداري آمرینو برخه لرله.
د غونډې د پرانیستې وینا پر مهال د ننګرهار پوهنتون د محصلانو چارو مرستیال پوهنیار حافظ سید محمد قاسم هاشمي په اداره کې د مکافاتو او مجازاتو د اصل پر ارزښت خبرې وکړې او محصلينو ته يې ددې ستر وياړ له امله، چې د پوهنځي د ممتازو محصلينو مقام يې خپل کړى، مبارکي وويله.
نوموړي وویل: د پوهنتون اداره او استادان هڅه کوي، چې محصلینو ته د تدریس او عملي زده کړو ښې او معیاري اسانتیاوې رامنځته کړي، چې له نېکه مرغه د همدې هلو ځلو پایله ده، چې زمونږ محصلینو د پوهنتون دننه او بهر ښې لاسته راوړنې لرلي او په ګڼو سیالیو او ازموینو کې ښه ځلېدلي دي.
د پوهنځیو د رئیسانو او استادانو په استازیتوب د ننګرهار پوهنتون د اقتصاد پوهنځي رئیس پوهنمل محمد صادق رهنما وینا وکړه او ممتازو محصلینو ته یې د مبارکۍ ورکولو سربېره هغوی خپلو مسؤلیتونو ته ځیر کړل.
نوموړي سپارښتنه وکړه، چې وخت بې ځایه تېر نه کړي او د خپلو درسونو تر څنګ د نوې ټکنالوژۍ څخه په ګټې اخيستنې مطالعه او تحقيق وکړي، چې له فارغېدو وروسته ټولنې ته د ښو کادرونو په توګه د خدمت جوګه شي.
د ممتازو محصلینو په استازیتوب د اقتصاد پوهنځي محصل جمال الدین فهیم خبرې وکړې او د پوهنتون له مشرتابه او محصلانو خدمتونو انسجام امریت مسؤلینو یې مننه وکړه، چې تل یې خپل استادان او محصلین تشویق او هڅولي دي.
د غونډې په وروستۍ برخه کې د پوهنتون د مسؤلینو او استادانو له خوا یادو ممتازو محصلینو ته برابر شوي ستاینلیکونه ورکړل شول.
په ورته مهال د ننګرهار پوهنتون طب پوهنځي د یوې غونډې په ترڅ کې د څېړنې په برخه کې د روزنیز ورکشاپ ګډونوال استادان، ممتاز محصلین او د هغو څانګو مسؤلین چې ډېرې لاسته راوړنې یې لرلې، تقدیر او وستایل.
سرچینه: د اطلاعاتو، نشراتو او عامه اړیکو امریت
