د ننګرهار پوهنتون رهبرۍ غړو ته د کیفیت لوړاوي د معیارونو او چیک لیستونو د تشریح او تفسیر سيمینار دایر شو .
یاد سيمینار چې په کې د کیفیت لوړاوي ۱۱ اصلي او ۴۹ فرعي معیارونه تشریح او تفسیر شول، ددې پوهنتون د علمي چارو معاونيت په نوښت او د کیفیت لوړاوي آمریت له خوا د پوهنتون رئیس، د علمي چارو، اداري او مالي چارو او محصلانو چارو مرستیالانو سربېره د څېړنو او علمي مجلو معاونیت یو شمېر کارکوونکو، د پوهنتون ریاست د دفتر آمریت مسؤلینو او مدیرانو ته دایر شو.
نوموړی سيمینار د کیفیت لوړاوي معیارونو په هکله پوهاوي ترلاسه کولو، د اعتبار سند ساتنې، پوهنتون کې د کیفیت لوړاوي معیارونو پلي کولو، اغېزمنو پلانونو او پالیسیو جوړولو، د پوهنتوني چارو سمې ارزونې او د پوهنتون غوره ستراتېژیک مدیریت په موخه دایر شو.
د سيمینار پر مهال د ننګرهار پوهنتون د کیفیت لوړاوي آمر پوهنوال علي جان عادل له لوري د پوهنتون رئیس او مرستیالانو اړوند د هغوی په چارو کې د کیفیت لوړاوي او چارو اغېزمنتیا په موخه د معیارونو پلي کولو په هکله معلومات وړاندې او د هغوی پوښتنې ځواب شوې.
