ننګرهار پوهنتون کې د تضمین کیفیت پروسې د معیارونو او چیک لیستونو د تشریح په لړۍ کې د ساینس پوهنځي مسؤلینو، د څانګو آمرینو، استادانو او کمېټو مشرانو ته یو ورځنی سیمینار دایر شو.
یاد سیمینار چې د ننګرهار پوهنتون د علمي چارو معاونیت په نوښت او د پوهنتون د تضمین کیفیت آمریت له خوا د پوهنتون د ټولو څانګو مسؤلینو او منسوبینو ته دایریږي، پر مهال یې د تضمین کیفیت پروسې د ۱۱ اصلي او ۴۹ فرعي معیارونو تشریح او تفسیر سربېره ددې پروسې د سم تطبیق او په چارو کې بهبود رامنځ ته کولو په اړه معلومات وړاندې کیږي.
د سيمینار د پرانیستې وینا پر مهال د ننګرهار پوهنتون د علمي چارو مرستیال پوهندوی مولوي احسان الله ناصح تضمین کیفیت پروسه کې د ساینس پوهنځي د مسؤلینو او استادانو د هلو ځلو مننه وکړه او ددې پروسې په اهمیت او اړتیا د خبرو کولو تر څنګ یې سپارښتنه وکړه، چې ټول باید د پوهنتون د اعتبار ساتنې په برخه کې د پام وړ هڅې ترسره او د خپلو کړنو راپورونه دې پر وخت اړوندې مرجع ته وسپاري.
نوموړي د استادانو له لوري تضمین کیفیت پروسه کې پراخه ونډه اخیستل د هغوی په علمي ترفیعاتو کې مهم وبلل او د ساینس پوهنځي او تضمین کیفیت آمریت مسؤلینو تر منځ په پیاوړې همغږۍ یې ټینګار وکړ.
ښاغلي ناصح دغه راز د پوهنتون د تضمین کیفیت آمر پوهنوال علي جان عادل څخه مننه وکړه، چې د سیمینار پر مهال په ډېر ښه شکل معلومات وړاندې کوي.
د ننګرهار پوهنتون د تضمین کیفیت آمر او د یاد سیمینار ارایه کوونکي استاد پوهنوال علي جان عادل په خپلو خبرو کې وویل: هڅه کوي د تضمین کیفیت پروسې معیارونه په تفصیلي شکل ارایه او اړونده برخه کې د ګډونوالو هر راز پوښتنې حل کړي، تر څو د پوهنتوني چارو کیفیت لوړ شي.
سرچینه: د اطلاعاتو، نشراتو او عامه اړیکو آمریت
