د حقوقو او شرعياتو پوهنځيو محصلينو له پېښې وروسته د محل د بررسۍ کولو تمثيل وړاندې کړ.
ياده تمثيلي صحنه، د ننګرهار پوهنتون د محصلانو انسجام امريت اړوند د حقوقي کلينک عمومي مديريت له لوري د حقوقو او سياسي علومو پوهنځي استاد پوهنوال محفوظ الله عارفي په مرسته او لارښوونه د يوه دېرش ورځني عملي ټريننګ په ترڅ کې ۲۲ تنو محصلينو ته جوړه شوې وه.
د تمثيل پر مهال د ننګرهار پوهنتون د حقوقو او سياسي علومو پوهنځي رئيس، استادانو، د محصلانو خدمتونو انسجام آمريت مسؤلينو، د لوړو زده کړو وزارت د محصلانو خدمتونو انسجام او همغږۍ رئيس او محصلينو حضور درلود.
د لوړو زده کړو وزارت د محصلانو خدمتونو د انسجام او همغږۍ رئیس استاد کليم الله محمدي د يادې تمثيلي صحنې په پای کې د خپلې وينا پر مهال د ننګرهار پوهنتون له رهبرۍ او محصلانو خدمتونو انسجام امريت څخه مننه وکړه، چې محصلينو لپاره د نظري زده کړو ترڅنګ د عملي زده کړو زمینه برابروي.
نوموړي د تدريسي بهير د لا پياوړتيا او عملي زده کړو په موخه د امکاناتو او فرصتونو ايجادولو په برخه کې د ننګرهار پوهنتون د رهبرۍ هڅې وستايلې او له استاد محفوظ الله عارفي څخه يې هم مننه وکړه؛ چې په ډېر ښه شکل سره يې محصلين پوه او عملي روزنه يې ورکړه.
د يادې موضوع سربېره محصلينو ته د ګوتو د نښو اخيستل او پښو پل معلومول هم تشريح او تمثيل شول.
سرچينه: د عامه اړيکو، اطلاعاتو او نشراتو آمريت
