د اقلیم بدلون نړیوال کنفرانس د علمي بورد غړو د ننګرهار پوهنتون مشرتابه سره غونډه وکړه:
په ننګرهار پوهنتون کې د اقلیم بدلون د نړیوال دایرېدونکي کنفرانس د علمي بورد غړو د دې پوهنتون رئیس او مرستیالانو سره په PDC مرکز کې غونډه وکړه.
د مجلس پر مهال د بورد غړو د خپلو کړنو او فعالیتونو ګزارش د پوهنتون مشرتابه سره شریک کړ، چې د پوهنتون د مشرتابه له خوا د علمي بورد او همدارنګه د کنفرانس د نورو کمېټو د راپورونو ارزونه وشوه.
د ننګرهار پوهنتون رئیس پوهاند دوکتور خلیل احمد بهسودوال او د علمي چارو مرستیال پوهندوی احسان الله ناصح په خپلو خبرو کې د کنفرانس د ټولو کمېټو د ترسره کړو کړنو ستاینه وکړه او د چارو د لا چټکوالي سپارښتنه یې وکړه.
د مجلس په وروستۍ برخه کې د رالېږل شویو مقالو د سرلیکونو، د کنفرانس د ځای، نېټې، مقالو لارښود، بروشرو، لوګو، ځانګړي ایمیل، ویب پاڼې، غونډو مهال وېش او نورو موضوعاتو په اړه بحث او لازمې پرېکړې وشوې.
سرچینه: د اړیکو، نشراتو او عامه پوهاوي آمریت
