د ننګرهار پوهنتون اړوندو پوهنځیو د محصلینو استازو د محصلانو چارو مرستیال سره غونډه وکړه.
یاده غونډه د محصلانو خدمتونو انسجام آمریت کې جوړه شوې وه، چې په ترڅ کې یې د پوهنتون د اړوندو ۱۳ ګونو پوهنځیو د محصلینو استازو خپلې ستونزې او وړاندیزونه د محصلانو چارو مرستیال سره شریک کړل.
د پوهنځیو په کچه محصلینو ته د عملي کارونو، څېړنو، تمثیلي محکمو او علمي سفرونو زمینه سازي، د لابراتوارونو او کمپیوټر لیبونو تجهیز، د ترانسپورت، روغتیا او لیلیې په برخو کې د اسانتیاوو رامنځته کول او ځینې نور موضوعات هغه څه وو، چې د محصلینو استازو یې د برابرولو غوښتنه وکړه.
د ننګرهار پوهنتون د محصلانو چارو مرستیال حافظ سید محمدقاسم هاشمي د محصلینو استازو ته ډاډ ورکړ، چې د پوهنتون امکاناتو ته په پام سره به د یادو اسانتیاوو د رامنځته کولو او شته ستونزو د حل په برخه کې کوټلي ګامونه واخلي.
د یادونې وړ ده، چې په یاده غونډه کې د ننګرهار پوهنتون د محصلانو خدمتونو انسجام آمر محمد داؤد فیضي او د یاد آمریت نورو کارکوونکو هم برخه لرله.
