د لوړو زده کړو وزارت د تضمین کیفیت او اعتبار ورکولو ریاست ارزوونکي پلاوي د ننګرهار پوهنتون مشرتابه سره ولیدل.
د ارزوونکو یاد اته کسیز پلاوي د لوړو زده کړو وزارت د تضمین کیفیت او اعتبار ورکولو رئیس استاد شاکر وحیدي په مشرۍ د مرغومي په ۲۵مه نېټه د ننګرهار پوهنتون رئیس، مرستیالانو او د تضمین کیفیت داخلي واحد مسؤل سره د دې پوهنتون د کلنۍ بیاکتنې او ارزونې په موخه مشورتي ناسته وکړه.
د ننګرهار پوهنتون رئیس پوهاند دوکتور خلیل احمد بهسودوال راغلي پلاوي ته د ښه راغلاست ویلو تر څنګ د ننګرهار پوهنتون د تاریخچې، تشکیلاتي جوړښت، پوهنځیو او څانګو، علمي برنامو، علمي، تدریسي او رغنیزو فعالیتونو، لاسته راوړنو او شته ستونزو په اړه هر اړخیز معلوماتي پریزنټیشن وړاندې کړ.
نوموړي زیاته کړه: ننګرهار پوهنتون څه دپاسه دوه کاله وړاندې د لوړو زده کړو وزارت د تضمین کیفیت او اعتبار ورکولو ملي پروسې په درېیم پړاو کې د هېواد په کچه په لوړو (۸۹،۵) نمرو د بشپړ علمي او اکاډمیک اعتبار سند ترلاسه کړی او تر دې دمه د نوموړي اعتبار د ساتلو او د پوهنتون د علمي او تدریسي وضعیت د بهبود او لا ښه والي لپاره په خپل ټول توان هلې ځلې کوي.
د لوړو زده کړو وزارت د تضمین کیفیت او اعتبار ورکولو رئیس استاد شاکر وحیدي ننګرهار پوهنتون د هېواد له سترو علمي او اکاډمیکو مرکزونو څخه یاد کړ، چې په وینا یې، تر دې دمه یې له ۴۰ زرو زیات علمي کادرونه روزلي دي.
نوموړي وویل: سره له دې، چې ننګرهار پوهنتون بشپړ اکاډمیک اعتبار اخیستی، خو تضمین کیفیت یوه دوامداره پروسه او ددې ستر علمي کانون د پرمختګ لپاره باید لا زیات کار وشي.
ښاغلي وحیدي وویل: راغلی اته کسیز پلاوی به د یوې اوونۍ په موده کې د ننګرهار پوهنتون اړوند پوهنځي، څانګې، علمي برنامې، علمي، تدریسي او اداري برخې، ملي او نړیوال ژورنالونه او نور اړوند شعبات وارزوي او راپور به یې د پوهنتون مشرتابه سره شریک کړي.
د ننګرهار پوهنتون د اداري او مالي چارو مرستیال پوهنیار قاضي خالد صداقت، د علمي چارو مرستیال پوهندوی احسان الله ناصح، د محصلانو چارو مرستیال حافظ سید محمد قاسم هاشمي او د تضمین کیفیت داخلي واحد مشر پوهندوی رضوان الله ممله وال د مجلس نور ویناوال وو، چې راغلي پلاوي ته یې د ارزونې په برخه کې د همکارۍ ډاډ ورکړ او زیاته یې کړه، چې د ننګرهار پوهنتون رهبري، استادان او ټول منسوبین په پوره تعهد او ژمنتیا سره د پوهنتون د علمي او تدریسي کیفیت د ښه والي او د غوره مسلکي کادرونو د روزلو لپاره نه ستړې کېدونکې هلې ځلې کوي.
د یاد مجلس وروسته د راغلي پلاوي غړو د ننګرهار پوهنتون د کرنې، ساینس او وترنري علومو پوهنځیو لیدنه او ارزونه وکړه.
