ننګرهار پوهنتون کې د HEMIS سیستم دوه ورځنی روزنیز ورکشاپ پیل شو.
یاد ورکشاپ د لوړو زده کړو وزارت د محصلانو چارو ریاست په نوښت ددې پوهنتون د محصلانو د خدمتونو انسجام آمریت کې جوړ شوی، چې د ننګرهار پوهنتون سربېره د کونړ، لغمان او نورستان پوهنتونونو تدریسي او اجرائیه مدیرانو ته به په کې د یاد سیستم د کارولو په اړه روزنه او پوهاوی ورکړل شي.
د ورکشاپ د پرانیستې وینا پر مهال د ننګرهار پوهنتون رئیس پوهاند دوکتور خلیل احمد بهسودوال د لوړو زده کړو وزارت د معلوماتي سیستم HEMIS د ارزښت او ښېګڼو په اړه خبرې وکړې.
نوموړي وویل: په ننګرهار پوهنتون کې د HEMIS سیستم څخه له وړاندې استفاده کېده، چې ددې روزنیز پروګرام په تطبیق سره به دا بهیر نور هم پیاوړی شي.
پوهاند بهسودوال د پوهنتون د اړوندو څانګو مسؤلینو ته سپارښتنه وکړه، چې د لوړو زده کړو محترم وزارت د هدایت او د پوهنتون ادارې له پرېکړې سره سم باید د محصلینو، استادانو، کریکولم او د پوهنتون د اړوندو نورو برخو ټول مواد په سافټ بڼه د HEMIS په انلاین سیستم کې ځای پر ځای کړي.
د لوړو زده کړو وزارت د محصلانو چارو آمر نجیب الرحمن وحدت یار د ورکشاپ د محتوا په اړه ګډونوالو ته معلومات ورکړل او زیاته یې کړه، چې د HEMIS سیستم په اړه به په راتلونکې کې نور روزنیز کورسونه هم دایر کړي.
د یادونې وړ ده، چې د یاد دوه ورځني ورکشاپ د روزنې چارې د علي احمد فرهمند او مجیب الرحمن سخي زاده له خوا پر مخ وړل کېږي.
