ننګرهار پوهنتون کې د ښوونکو بستونو کانکور ازموینې لپاره د چمتووالي غونډه جوړه شوه.
په نوموړې کاري ناسته کې، چې د پوهنتون د رئیس پوهاند دوکتور خلیل احمد بهسودوال په مشرۍ ترسره شوه، د پوهنتون مرستیالانو، د ځینو پوهنځیو رئیسانو، د استادانو چارو، محصلانو چارو، اړیکو او نشراتو، خدماتو او د لیلیو مسؤلینو برخه لرله.
د مجلس پر مهال د ننګرهار پوهنتون رئیس پوهاند دوکتور خلیل احمد بهسودوال اړوندو مسؤلینو ته د کانکور د راتلونکې ازموینې لپاره د اړینو تدابیرو نیولو او لازم چمتووالي سپارښتنه وکړه.
د کارتونو وېش، بایومتریک او ازموینې لپاره د مناسبو محلونو جوړول، د ممتحنو استادانو ټاکل، امنیت او خوندیتوب، صحي ټیمونو ګمارل، ترانسپورت، له رسنیو د کانکور اړوند خبرتیاوو او معلوماتو خپرول هغه موضوعات وو، چې په غونډه کې پرې بحث او خبرې وشوې.
د ازموینو ملي ادارې له پلان سره سم د ننګرهار ولایت د ښوونکو بستونو کانکور ازموینې د کارتونو وېش او بایومتریک پروسه به راتلونکې شنبه، یکشنبه او دوشنبه د چنګاښ په (۲۵، ۲۶، ۲۷مه) نېټه او د کانکور ازموینه به د سه شنبې، چهارشنبې، پنجشنبې او جمعې په ورځو د چنګاښ په (۲۸، ۲۹، ۳۰، ۳۱مه) نېټه په ننګرهار پوهنتون کې واخیستل شي.
