ننګرهار پوهنتون کې د چاپېریال زرغون ساتنې، ملي شتمنیو ساتنې او د مطالعې ارزښت تر سرلیکونو لاندې درې بېلابېلې مناظره يي غونډې جوړې شوې.
یادې غونډې د افغانستان د ملي راډیو تلویزیون ادارې په نوښت او د ننګرهار پوهنتون په کوربتوب ترسره شوې، چې په کې ددې پوهنتون د مسؤلینو او استادانو سربېره سلګونو تنو محصلینو او ځوانانو برخه لرله.
د یادو بحثونو مېلمانه د ژبو او ادبیاتو پوهنځي استاد پوهاند جانس زړن، د کرنې پوهنځي استاد پوهنوال محمد اسماعیل سعادت، د علمي تحقیقاتو کمېټې مسؤل پوهنمل محمد ملیار رحماني، د ننګرهار د کرنې ریاست د طبیعي سرچینو متخصص نصیب الله رحیمزی، شاعر او لیکوال ضیاءالدین همت مل او ټولنیز فعال فردوس بشرمل وو، چې د اړوندو موضوعاتو په اړه یې بحث او خبرې وکړې او د محصلینو او ګډونوالو پوښتنې یې ځواب کړې.
د ننګرهار پوهنتون د علمي چارو مرستیال پوهندوی احسان الله ناصح او د دې پوهنتون د چاپېریال ساتنې کمېټې مشر پوهنوال سید اکرم هاشمي د ملي راډیو تلویزیون ادارې مننه وکړه، چې په یادو مهمو موضوعاتو یې محصلینو او ځوانانو ته د عامه پوهاوي غونډې جوړې کړې او له ګډونوالو محصلینو او استادانو یې غوښتنه وکړه، چې له محتوا او پیغام یې ګټه پورته کړي او د ټولنې نورو وګړو ته په رسولو کې یې خپل مسؤلیت په ښه توګه ادا کړي.
د یادونې وړ ده، چې له نوموړو مناظره يي غونډو او بحثونو یو ساعته خپرونې هم ثبت شوې، چې د ملي راډیو تلویزیون له څپو به خپرې شي.
