ننګرهار پوهنتون کې د څېړنې پېژندنې ۳ ورځنی ورکشاپ پیل شو.
یاد ورکشاپ، چې د ننګرهار پوهنتون د ساینسي او اجتماعي علومو پوهنځیو ۳۰ تنو استادانو ته ددې پوهنتون د څېړنو او علمي مجلو معاونیت له لوري دایر شوی؛ پر مهال یې د تحقیق اساسات، اصول، ډیزاین، معلوماتو راټولول، تحلیل او پرپوزل لیکنې سربېره د څېړنې ترسره کولو اړوند اړین معلومات وړاندې کیږي.
د ورکشاپ ګډونوالو ته د وینا پر مهال د ننګرهار پوهنتون رئیس شــ/یخ انعام الله مدني د څېړنې په ارزښت او اهمیت خبرې وکړې او یاد ورکشاپ یې ډېر ګټور وباله.
نوموړي د ورکشاپ ګډونوالو سره د څېړنو ترسره کولو په برخه کې د هر راز اسانتیاوو او امکاناتو برابرولو ژمنه وکړه او هغوی ته یې د فعال ګډون سپارښتنه وکړه.
د ننګرهار پوهنتون د علمي چارو مرستیال پوهندوی مــ/ولوي احسان الله ناصح د خپلو خبرو پر مهال ګډونوالو ته سپارښتنه وکړه، چې د ورکشاپ د موادو څخه اعظمي استفاده وکړي او د خپل پوهنځي له استادانو سره یې شریک کړي.
نوموړي ژمنه وکړه، چې په راتلونکي کې به هم د استادانو د ظرفیت لوړونې په خاطر ورته ورکشاپونه دایر کړي.
د یادونې وړ ده، چې د ورکشاپ۳ یمه ورځ د استادانو له لوري د تدریس شويو موضوعاتو اړوند عملي کار ته ځانګړې شوې ده.
سرچینه: د عامه اړیکو، اطلاعاتو او نشراتو آمریت
