ننګرهار پوهنتون کې د څه دپاسه ۷ میلیونه افغانیو په لګښت د رغنیزو چارو پرانیسته شوه.
په یادو رغنیزو چارو کې د دې پوهنتون د طب، ښوونې او روزنې، شرعیاتو، وترنري علومو، ژبو او ادبیاتو او انجنیري پوهنځیو، د مرکزي لیلیې، پخلنځي، خوړنځي، مېلمستون، پوسته خانې او جنسي ډیپوګانو ودانیو بیا رغاونه او ترمیمات شامل دي، چې چارې به یې د څلورو میاشتو په موده کې بشپړې شي.
د یادو رغنیزو چارو پرانیسته د زمري په ۱۷مه د ننګرهار پوهنتون رئیس پوهاند دوکتور خلیل احمد بهسودوال په داسې حال کې وکړه، چې د محصلانو چارو مرستیال پوهنوال سید اکرم هاشمي، د شرعیاتو پوهنځي رئیس پوهاند دوکتور اسرارالحی منیب، د وترنري علومو پوهنځي رئیس پوهنوال پیرمحمد ستانکزي او یو شمېر استادانو او اداري کارکوونکو یې ملتیا کوله.
پوهاند بهسودوال د یادو رغنیزو چارو په پيل خوښي وښوده او زیاته یې کړه، چې ددې رغنیزې پروژې په تطبیق سره به د پوهنتون په ذکر شویو پوهنځیو او اداري څانګو کې شته ستونزې له منځه لاړې شي.
نوموړي د لوړو زده کړو وزارت د مشرتابه مننه وکړه، چې د دې رغنیزو چارو مالي ملاتړ یې وکړ او د ودانیز شرکت مسؤلینو ته یې جدي سپارښتنه وکړه، چې یادې رغنیزې چارې د قرارداد سره سم په ټاکلي وخت پای ته ورسوي.
