ننګرهار پوهنتون کې د پکتیکا او خوست ولایتونو زلزله ځپلو لپاره د مرستې راټولولو کمپاین په لړ کې یوه بهر مېشتي افغان مبصر طلعت د ۲۵ زره افغانیو مرسته وکړه.
ښاغلی طلعت، چې د انګلستان په هېواد کې اوسېږي، یاده مرسته یې ننګرهار پوهنتون ته رالېږلې وه، چې نن ورځ د پوهنتون د رئیس پوهاند دوکتور خلیل احمد بهسودوال له خوا د مرستې راټولولو کمپاین کمېټې غړو پوهنوال سید اکرم هاشمي او پوهنیار احمد جمیل پوپلزي ته وسپارل شوه.
د ننګرهار پوهنتون رئیس د ښاغلي مبصر طلعت د اسلامي او هېوادني احساس مننه وکړه او نوموړي ته یې د الله تعالی له درباره د اجر غوښتنه وکړه.
پوهاند بهسودوال په ټولو وطن مېشتو او بهر مېشتو افغانانو غږ وکړ، چې د خپلې وسعې او توان په اندازه د زلزله ځپلو هېوادوالو سره مرسته وکړي او په دې توګه خپل ملي او اسلامي رسالت ادا کړي.
د یادونې وړ ده، چې په ننګرهار پوهنتون کې د پکتیکا او خوست ولایتونو زلزله ځپلو لپاره د مرستې راټولولو کمپاین د چنګاښ په ۶مه نېټه پیل شوی، چې ددې پوهنتون په بېلابېلو پوهنځیو کې دوام لري.
