ننګرهار پوهنتون کې د پایلو پر بنسټ او محصل محورۍ تدریسي تګلارو (OBE-SCL) د زده کړې ۱۲ ورځنی ورکشاپ پای ته ورسېد.
یاد ورکشاپ د پوهنتون د مسلکي زده کړو پرمختیایي مرکز (PDC) په نوښت جوړ شوی ؤ، چې د ننګرهار پوهنتون د اړوندو پوهنځیو ۲۰ تنو استادانو په کې برخه لرله.
د ننګرهار پوهنتون رئيس پوهاند دوکتور خلیل احمد بهسودوال د ورکشاپ د پای مراسمو کې د پایلو پر بنسټ او محصل محورۍ زده کړو په اړتیا او ارزښت خبرې وکړې او زیاته یې کړه، چې د پوهنتون اداره هڅه کوي، چې د تدریس د دودیزو تګلارو پر ځای نړیوالې معیاري تګلارې عامې کړي.
پوهاند بهسودوال د مسلکي زده کړو د پرمختیايي مرکز د مسؤلینو او د ورکشاپ د روزونکو استادانو څخه د مننې تر څنګ برخوالو استادانو ته سپارښتنه وکړه، چې ترلاسه شوي مهارتونه د خپلو اړوندو پوهنځیو او څانګو له استادانو سره هم شریک کړي.
د ننګرهار پوهنتون د علمي چارو مرستیال پوهندوی دوکتور محمد حامد کډوال او د مسلکي زده کړو پرمختیایي مرکز مسؤل پوهنیار محمد ملیار رحماني نور ویناوال وو، چې د ورکشاپ د ارزونې سربېره یې ژمنه وکړه، چې د پوهنتون د محترم مشرتابه په ملاتړ به په راتلونکې کې د استادانو د ظرفیت لوړونې لپاره په لیډرشیپ او نورو برخو کې روزنیز ورکشاپونه دایر کړي.
د ګډونوالو استادانو په استازیتوب د ژورنالېزم او ارتباطاتو پوهنځي استاد پوهنیار سید عباس سادات د پوهنتون له ادارې مننه وکړه او د ترسره شوي ورکشاپ مواد یې نوي او د استادانو لپاره مهم وبلل.
د ورکشاپ په وروستۍ برخه کې د پوهنتون د مشرتابه او د ورکشاپ د روزونکو له خوا استادانو ته سندونه ورکړل شول.
