ننګرهار پوهنتون کې د هېواد د خپلواکۍ ۱۰۲ مې کالیزې د نمانځې په موخه مشورتي ناسته ترسره شوه.
یاده غونډه د ننګرهار پوهنتون رئیس پوهاند دوکتور خلیل احمد بهسودوال په مشرۍ ترسره شوه، چې د ګډونوالو له خوا په کې د خپلواکۍ د ۱۰۲ مې کالیزې د ښې نمانځې په اړه بحث او خبرې اترې وشوې.
د پوهنتون رئیس د خپلواکۍ ورځې د نمانځې په اړتیا او ارزښت خبرې وکړې او زیاته یې کړه، چې پوهنتونونه د ځوانانو د فکري روزنې مرکزونه دي او مونږ او تاسې باید هڅه وکړو، چې ځوان نسل له خپلې ویاړمنې ماضي خبر کړو او د استقلال او ازادۍ په ارزښت یې وپوهوو.
د مجلس ګډونوالو د یادې ورځې د ښې نمانځې په اړه خپل وړاندیزونه او نظرونه شریک کړل، چې له زیات بحث وروسته پرېکړه وشوه، چې یاده ملي او تاریخي ورځ باید د ګڼو نورو پروګرامونو او مراسمو تر څنګ د یوه علمي او تحقیقي سیمینار په جوړېدو سره ونمانځل شي، چې استادان به په کې د ازادۍ او استقلال په دیني، تاریخي، کلتوري او سیاسي اړخونو علمي مقالې او پریزنټیشنونه وړاندې کړي.
