ننګرهار پوهنتون کې (د ننګرهار د اتلولۍ مناظره) ترسره شوه
یاد دوه ورځنی پروګرام د اندیشه وِران بنسټ په نوښت ددې پوهنتون د محصلینو خدمتونو د انسجام په امریت کې جوړ شوی ؤ، چې د ننګرهار او خراسان پوهنتونونو ۳۲ تنو محصلینو په کې برخه لرله.
د مناظرې د پای مراسمو ته د وینا پر مهال د ننګرهار پوهنتون د محصلانو چارو مرستیال پوهندوی سید اکرم هاشمي وویل: له دغه ډول پروګرامونو یې موخه په اړونده برخه کې د محصلینو ظرفیت لوړونه او د دوی تر منځ د زغم او تفاهم فرهنګ دودول دي.
ښاغلي هاشمي د اندیشه وران بنسټ له مسؤلینو مننه وکړه، چې د محصلینو او ځوانانو په روزنه کې له ننګرهار او نورو پوهنتونونو سره مرسته کوي.
د اندیشه وران بنسټ مسؤلینو بهارا حسیني، حسن حمید او د یادې ادارې د ننګرهار څانګې مسؤل وحید زهیر د غونډې نور ویناوال وو، چې د مناظرې د موخو او نورو خواوو په اړه یې برخوالو ته معلومات ورکړل.
د غونډې په پای کې د مناظرې د دوه ټیمونو ګټونکو ګډونوالو همیم الله ساپي، ریاض الله مقامزي، مبشر شاه میاخېل او سلما حمید ته ایوارډونه او پاتې ګډونوالو ته سندونه ورکړل شول.
د یادونې وړ ده، چې د مناظرې غوره ویناوال فرید مومند او سلما دیاني وټاکل شول، چې د مسؤلینو له خوا تقدیر شول.
