ننګرهار پوهنتون کې (د مور په شېدو سره د ماشوم د تغذیې اوونۍ) د يوې سترې غونډې په ترڅ کې ونمانځل شوه.
ياده نمانځغونډه، چې د دې پوهنتون د طب پوهنځي فرهنګي کمېټې له خوا د سپین غر لوړو زده کړو موسسې په تخنیکي مرسته جوړه شوې وه، د ننګرهار پوهنتون او طب پوهنځي د مشرتابه او استادانو سربېره په کې د سپین غر او د لوړو زده کړو د نورو خصوصي تحصیلي موسساتو، یونسیف او PU-AMI ادارو مسؤلینو هم برخه لرله.
د غونډې د پرانيستې وينا پر مهال د ننګرهار پوهنتون رئيس پوهاند دوکتور خليل احمد بهسودوال د غونډې برخوالو ته د ښه راغلاست تر څنګ د مور په شېدو سره د ماشوم د تغذیې اوونۍ د نمانځې د موخو او ارزښت په اړه خبرې وکړې.
نوموړي وويل: ددې اوونۍ د نمانځې عمده موخه د مور له خوا ماشوم ته د شېدو ورکولو د روغتیايي، اقتصادي او ټولنیزو ګټو او د مهلکو امراضو څخه د هغوی د ساتنې په اړه وګړو ته د عامه پوهاوي ورکول دي.
پوهاند بهسودوال د طب پوهنځي د رهبرۍ او د یاد پوهنځي د فرهنګي کمېټې د مسؤلینو او همدارنګه د سپین غر لوړو زده کړو موسسې د مشرتابه پلاوي مننه وکړه، چې په هلو ځلو یې یاده ارزښتمنه غونډه دایره شوه.
د ننګرهار پوهنتون طب پوهنځي رئیس پوهنوال ډاکتر محمد عظیم عظیمي، د سپین غر لوړو زده کړو موسسې رئیس ډاکتر محمد اسحاق صافی، د طب پوهنځي د کوچنیانو څانګې مشر پوهاند ډاکتر عبدالستار نیازی، د یادې څانګې بل استاد پوهنوال ډاکتر حقیق الله چهاردیوال، د طب پوهنځي د فرهنګي کمېټې مشر پوهنمل ډاکتر توریالی احساس او د شرعیاتو پوهنځي استاد پوهنوال دوکتور شېرزاد عزیزي د غونډې نور ویناوال وو، چې د غونډې د موضوع او محتوا په اړه یې ويناوې او پريزنټيشنونه وړاندې کړل او د ګډونوالو پوښتنې یې ځواب کړې.
په پاى کې د طب پوهنځي مرستیال او استاد پوهنوال ډاکتر محب الله شینواري د غونډې ارزونه وکړه او د موضوع په تړاو یې خپلې سپارښتنې او وړاندیزونه د غونډې برخوالو سره شریک کړل.
