ننګرهار پوهنتون د کب ۲۰ مه، د هیواد د فرهنګي میراثونو د ساتنې او ملاتړ ملي ورځ ولمانځله
.
په هغه غونډه کې چې په همدې مناسبت د پوهنتون د فرهنګي کمېټې له لوري د ژبو او ادبیاتو پوهنځي د غونډو په تالار کې برابره شوې وه، د قرآنکریم د څو مبارکو ایتونو تر تلاوت او ملي سرود ته تر درناوي وروسته د یاد پوهنځي د رئیس پوهنمل محمد عارف حازم پر پرانیستې وینا پیل شوه.
وروسته د ننګرهار پوهنتون د محصلانو چارو مرستیال پوهنوال سید اکرم هاشمي د یادې ملي ورځې او د هغې د لمانځلو پر ارزښت خبرې وکړې.
د غونډې په دویمه برخه کې د انجینرۍ پوهنځي استاد پوهنیار فضل اکبر د فرهنګي میراثونو او په ځانګړې توګه ملموسو فرهنګي میراثونو پر پېژندنې او ارزښت چمتو کړی پریزنټیشن وړاندې کړ. دغه راز، د ښوونې او روزنې پوهنځي استاد پوهاند دوکتور محمد ابراهیم همکار پر غیر ملموسو فرهنګي میراثونو لکچر وړاندې کړ چې د غونډې د ګډونوالو له لوري یې هرکلی وشو او وستایل شو.
د یادونې وړ ده، چې غونډې ته د محصلینو د ښې اګاهۍ په موخه غونډې ته د هیواد د تاریخي ودانیو او ځایونو عکسونه او موډلونه هم د نندارې لپاره راوړل شوي و.
غونډه د پوهندوی دوکتور الفت الله له لوري په دعایې سره پای ته ورسېده.
