د کمال خان بند د پرانیستې په مناسبت د ننګرهار پوهنتون د استادانو له خوا لیکل شوې مقالې او څېړنې د ټاکل شوې کمېټې له خوا وارزول شوې.
یادې مقالې د کرنې، اقتصاد، انجنیري، شرعیاتو او ښوونې او روزنې پوهنځیو د استادانو له خوا د کمال خان بند د کرنیز، سیاسي، اقتصادي، شرعي او تاریخي ارزښت په اړه لیکل شوي دي.
د چمتووالي کمېټې د ننګرهار پوهنتون د رئیس پوهاند دوکتور خلیل احمد بهسودوال په مشرۍ غونډه وکړه، چې د علمي چارو او محصلانو چارو مرستیالانو، د کرنې، انجنیري، اقتصاد او شرعیاتو پوهنځیو مسؤلینو او استادانو په کې برخه لرله.
د مجلس غړو ترسره شوې څېړنې مثبتې وارزولې او پرېکړه وشوه، چې یادې څېړنې او علمي مقالې به په ننګرهار پوهنتون کې د کمال خان بند په اړه جوړېدونکي علمي کنفرانس کې د ارایه کېدو سربېره د اوبو د تنظیم ملي ادارې ته هم ولېږل شي.
