د کابل پوهنتون وترنري علومو پوهنځي محصلینو د ننګرهار پوهنتون وترنري علومو پوهنځي څخه لیدنه وکړه.
د کابل پوهنتون د وترنري علومو پوهنځي مسؤلینو، استادانو او د وروستي کال لسګونه تنو محصلینو د یو علمي سیر په ترڅ کې د ننګرهار پوهنتون وترنري علومو پوهنځي څخه لیدنه وکړه او د یاد پوهنځي مختلفو برخو، امکاناتو، فعالیتونو، پرمختګونو او لاسته راوړنو په هکله یې معلومات ترلاسه کړل.
د لیدنې پر مهال دواړو لوریو راتلونکي کې د محصلینو ظرفیت لوړونې په موخه د متقابلو همکاریو ترسره کولو ژمنه وکړه او د فعالیتونو لا ښه والي په هدف یې له یو بل سره مشورې او نظریات شریک کړل.
په همدې مناسبت جوړې شوې غونډې ته د ننګرهار پوهنتون د څېړنو او علمي مجلو مرستیال پوهندوی دوکتور سعید محمد وقار له کابل پوهنتون څخه راغلي پلاوي او محصلینو ته ښه راغلاست ووایه، محصلینو لپاره د علمي سیرونو، د استادانو تر منځ مسلکي تجربو شریکولو په اهمیت او د پوهنتونونو تر منځ د ګډو علمي همکاریو په ارزښت خبرې وکړې.
نوموړي همدارنګه ننګرهار پوهنتون کې د استادانو او محصلینو روانو تحقیقاتي پروژو په هکله معلومات وړاندې کړل او راغلي محصلین کې خپلو اړوندو مسلکي برخو کې زیات کار کولو ته وهڅول.
له کابل پوهنتون څخه راغلو محصلینو او مسؤلینو همدارنګه د ننګرهار پوهنتون وترنري علومو پوهنځي اداري شعباتو، تدریسي خونو، لابراتوارونو،کتابتون، کبانو روزنې فارم، څېړنیز فارم، حیواني کلینیک او نورو بېلابېلو برخو څخه لیدنه وکړه، چې د مسؤلینو له خوا ورته اړین مسلکي معلومات ورکړل شول.
راغلو محصلینو او استادانو په خپلو خبرو کې د ننګرهار پوهنتون وترنري علومو پوهنځي مسؤلینو او استادانو څخه مننه وکړه، چې د دوی یې ښه کوربتوب وکړ او د خپل پوهنځي اړوند یې تفصیلي معلومات ورسره شریک کړل.
