د پکتیا پوهنتون محصلینو له ننګرهار پوهنتون څخه لیدنه وکړه.
د پکتیا پوهنتون کرنې پوهنځي اګرانومي څانګې ۱۳ تنو محصلینو د یاد پوهنځي د دوو تنو استادانو په ملتیا د علمي سیر په ترڅ کې ننګرهار پوهنتون څخه لیدنه وکړه او ددې پوهنتون په اړه یې هر اړخیز معلومات ترلاسه کړل.
راغلو محصلینو او استادانو یې د ننګرهار پوهنتون د بېلابېلو برخو لیدلو څخه وروسته د پوهنتون رئیس او د علمي چارو مرستیال سره په ریاست مقام کې ولیدل او د پوهنتون اړوند یې هغوی سره خپل تأثرات شریک کړل.
د ننګرهار پوهنتون رئیس شیخ انعام الله مدني راغلو محصلینو ته د ښه راغلاست ویلو وروسته محصلینو لپاره د علمي سفرونو په اړتیا او اهمیت خبرې وکړې او یاده چاره یې د محصلینو په روزنه کې ګټوره وبلله.
د ننګرهار پوهنتون د علمي چارو مرستیال پوهندوی مولوي احسان الله ناصح په خپلو خبرو کې علمي سیرونه د بېلابېلو ولایتونو د خلکو د کلتورونو او افکارو تبادلې او مسلکي پوهې زیاتوالي په برخه کې مهم وبلل او راغلو محصلینو ته یې د پوهنتون د تاریخچې، پوهنځیو ایجاد، لیسانس او فوق لیسان برنامو، کادري او غیر کادري پرسونل په اړه معلومات ورکړل.
د پکتیا پوهنتون محصلینو سره راغلو لارښود استادانو د ننګرهار پوهنتون له مشرتابه مننه وکړه، چې د دوی محصلینو ته یې د پوهنتون لیدنې زمینه برابره کړه.
د یادونې وړ ده، چې ننګرهار پوهنتون ته په علمي سفر راغلو یادو محصلینو ته د محصلانو خدمتونو انسجام امریت مسؤلینو له خوا د پوهنتون د مختلفو برخو، علمي، تدریسي او څېړنیزو امکاناتو او سهولتونو په اړه معلومات ورکړل شول.
