د ننګرهار پوهنتون ژورنالېزم او عامه اړیکو پوهنځي څخه ۱۰۴ تنه فارغ شول
د پوهنتون د مسؤلينو په وينا، ياد فارغان يې د رادیو تلوېزیون او مطبوعاتو څانګو کې روزلي دي.
په همدې مناسبت د ننګرهار پوهنتون شرعیاتو پوهنځي د غونډو په تالار کې ستره غونډه جوړه شوې وه، چې د ژورنالېزم او عامه اړیکو پوهنځي د مسؤلینو، استادانو او فارغانو سربېره په کې د ننګرهار پوهنتون رئیس، د اداري او مالي چارو مرستیال، د شرعیاتو پوهنځي رئیس، ژورنالېستانو او د فارغانو د کورنیو غړو برخه لرله.
فراغت غونډې ته د وينا پر مهال د ننګرهار پوهنتون رئيس پوهاند دوکتور خلیل احمد بهسودوال وويل: د خوښۍ ځاى دى، چې نن ورځ د ژورنالېزم او عامه اړیکو پوهنځي په پنځمه دوره کې ۱۰۴ تنه مسلکي کادرونه فارغ او ټولنې ته د خدمت په موخه وړاندې کړل.
نوموړي فارغو محصلانو او د هغوى کورنيو ته مبارکي وويله او زياته يې کړه، چې د شته صلاحيت او استعداد نه په ګټې اخيستنې د خپل هېواد او ټولنې په سمون او رغښت کې کار واخلي.
د پوهنتون رئيس فارغان خپلو مسؤليتونو ته ځير کړل او غوښتنه يې ترې وکړه، چې په راتلونکې هم د خپل پوهنتون سره په اړيکه کې واوسي او په ابادۍ او ښيرازۍ کې يې برخه واخلي.
د ژورنالېزم او عامه اړیکو پوهنځي رئیس پوهندوی سید سمیع الله سعیدي د غونډې بل ویناوال ؤ، چې فارغانو او د هغوی د کورنیو غړو ته د مبارکۍ تر څنګ یې وویل: ((له تاسو څخه مو هیله داده، لکه څرنګه چې د ژورنالیزم مسلک سپېڅلي او ځانګړي اخلاقي او کاري کوډونه لري، هغې ته په پام سره په ټولنه کې د ژمن او مسلکي ژورنالېست په توګه پل کېږدئ او دا ثابته کړئ، چې مسلکي ژورنالېستان د ټولنې د اذهانو تنویر، پرمختګ او سمون لپاره ډېر څه کولی شي.))
د فارغانو په استازۍ محمد سلیم جهان او د فارغانو د والدینو په استازیتوب قاضي مېرویس خبرې وکړې او د ننګرهار پوهنتون او ژورنالېزم پوهنځي له مشرتابه او استادانو یې مننه وکړه، چې د یادو فارغانو په روزنه کې یې نه ستړې کېدونکې هلې ځلې کړي دي.
د غونډې په پای کې پر فارغانو د فراغت تصدیقونه وویشل شول.
