د ننګرهار پوهنتون مشرتابه په دې پوهنتون کې د ازموینو له روان بهیر څخه نظارت ترسره کړ.
د ننګرهار پوهنتون رئیس شیخ انعام الله مدني د محصلانو چارو مرستیال پوهنیار حافظ سید محمد قاسم هاشمي په ملتیا په پوهنتون کې د سمستر نهايي ازموینو له روان بهیر څخه لیدنه وکړه او د ازموینو د نظم او شفافیت په اړه یې مسؤلینو ته لازمې سپارښتنې وکړې.
د پوهنتون یاد مسؤلین د بېلابېلو پوهنځیو په صحنو وګرځېدل او د جوړو شویو پوښتنو ارزونې سربېره یې د ازموینو د صحنو نظم، شفافیت او محصلینو ته د چمتو شویو اسانتیاوو په اړه معلومات ترلاسه کړل.
نوموړو محصلین د اصولو او مقرراتو رعایت ته راوبلل او ډاډ یې ورکړ، چې د پوهنتون رهبري د ازموینو شفافیت ته بشپړه ژمنتیا لري.
