د ننګرهار پوهنتون مسؤلینو د ننګرهار ولایت کرنې، اوبو لګولو او مالدارۍ رئیس سره غونډه وکړه.
د یادې غونډې پر مهال د کرنې پوهنځي اګرانومي څانګې ماسترۍ برنامې محصلینو د څېړنیزو فعالیتونو مؤثریت، خپلمنځي همکاریو پراختیا او راتلونکي کې محصلینو ته د لازمو سهولتونو چمتو کولو په اړه بحث او خبرې وشوې.
د ننګرهار پوهنتون د اداري او مالي چارو مرستیال مفتي نعمت الله اعزازي د خپلو خبرو پر مهال د دواړو ادارو تر منځ د پیاوړو متقابلو همکاریو په اهمیت وغږېد او د کرنیز سکتور پرمختګ لپاره یې د استادانو او محصلینو څېړنیز فعالیتونه مهمه چاره یاده کړه.
د ننګرهار پوهنتون کرنې پوهنځي رئیس پوهنمل طیب الله زاهد وویل، هڅه کوي د سکتوري ادارو او کروندګرو اړتیاوو ته په کتو او ستونزو حل په موخه د استادانو او محصلینو له خوا تحقیقاتي فعالیتونه ترسره کړي او یاده برخه کې یې د کرنې، اوبو لګولو او مالدارۍ ریاست له امکاناتو ګټه اخیستنه او همکاري اړینه وبلله.
د کرنې پوهنځي اګرانومي څانګې آمر پوهندوی دوکتور عصمت الله دراني د یادې څانګې ماسترۍ برنامې محصلینو له لوري په بېلابېلو ساحو کې د ترسره شویو څېړنو، لاسته راوړنو او اړتیاوو په اړه تفصیلي خبرې وکړې او مختلفو مواردو کې یې د مرستې او همکارۍ غوښتنه وکړه.
د ننګرهار کرنې، اوبو لګولو او مالدارۍ رئیس مولوي محمد ولي محسن د کرنې په برخه کې د ننګرهار پوهنتون د استادانو او محصلینو څېړنې اړینې وبللې او راتلونکي کې یې د هر اړخیزې مرستې او همکارۍ ډاډ ورکړ.
