د ننګرهار پوهنتون مرکزي کتابتون په عصري ډیټابیس او وسایلو سمبال شو.
د ننګرهار پوهنتون په مرکزي کتابتون کې د کتابتون مدیریت معلوماتي نظام (LMIS) فعال او ګټې اخیستنې ته وسپارل شو، چې ورسره به د کتابتون چارې په معیاري، منظم او برېښنايي ډول مدیریت کېږي.
د مسؤلینو په وینا، د کتابتون مدیریت دا نظام به د کتابونو، لیکوالانو،کتابتون کاروونکو معلومات، د کتابونو د ورکړې، بېرته اخیستو او موجودیت ریکارډ په برښنايي بڼه ثبت او د احصایوي راپورونو په چمتو کولو سره به د کتابتون کارکوونکو ته د کتابونو، استفاده کوونکو او اړتیاوو په هکله کره معلومات وړاندې کوي.
د ننګرهار پوهنتون د علمي څېړنو مرستیال پوهندوی دوکتور سعید محمد وقار وویل، دا پرمختګ به استادانو او محصلینو ته د اړتیا وړ علمي سرچینو اسانه موندلو زمینه برابره کړي،کتابتوني خدمتونه به ورسره لا معیاري او وخت سپما شي.
نوموړي د ننګرهار پوهنتون مرکزي کتابخانه کې د یاد نظام او عصري وسایلو په فعالولو کې د سپین غر خصوصي پوهنتون له تخنیکي همکارۍ مننه وکړه.
سرچینه: د نشراتو او عامه اړیکو امریت
